Governu halao lansamentu aplicasaun móbil ba kombate violénsia hasoru feto
Sekretáriu Estadu Komunikasaun Sosial ( SEKOMS ), Merício Juvinal do Reis “Akara”, ho Sekretária Estadu Igualdade Jéneru no Inklusaun (SEII), Maria José da Fonsenca Monteiro de Jesus, iha kinta-feira, 06/11/2018 hala’o lansamentu ba Aplikasaun Rede “Hamahon” Referál no Pakote Rekursu ba Mídia Kona-ba Prevensaun Violénsia kontra Feto iha salaun Fundasaun Ázia, Luro Mata, Dili.
Iha diskursu Sekretáriu Estadu Komunikasaun Sosial hateten, pontu importante ba lansamentu ne’e oinsá promove komunikasaun ne’ebé mak partisipativu. Iha meios barak atu uza iha komunikasaun para bele fó atensaun lalais hodi buka solusaun.
“Jornalista sira presiza formasaun jéneru iha kontektu violénsia doméstika, no tempu ona ita fó koñesimentu klean ba jornalista sira halo notísia no uza termus ida ne’ebé mak atu bele públika”, tenik SECOMS.
Tuir Sekretária Estadu Igualdade Jéneru no Inklusaun Maria José da Fonsenca Monteiro de Jesus hateten ho lansamentu ida ne’e sei enkonraja no fasilita vítima sira atu berani hato’o keixa ba iha rede referál tanba informasaun hotu sira bele hetan liu hosi aplikasau ne’e, nomos bele fasilita prosesu investigasaun ida ne’ebé justu no la-fó todan ba vítima sira. Ha’u fiar katak ho aplikasaun rede “Hamahon” ida ne’e sei kontribui ba halo mudansan iha mentalidade no atitude ba ema sira atu halo prenvensaun ba kombante violénsia hasoru feto no labarik sira.
Maria José hateten katak ho apoiu, komprensaun no koñesimentu husi aplikasaun Rede “Hamahon” ida ne’e jornalista sira bele halo notísia ho kualidade bazeia ba evidénsia no bele aprezenta ho dalan ida ne’ebé sensível ba jéneru.
Iha tempu hanesan Chargé D’affaires ba Governu Austrália, Philipa Venning, hateten aplikasaun foun ne’e bele sai salva vida vítima sira husi violénsia doméstika nomós tulun sira atu asesu lais liu ba apoiu kualidade di’ak.
“Servisu hasoru eliminasaun violénsia kontra feto sei nafatin prioridade prinsipál ba programa apoiu dezenvolvimentu husi Austrália, no ami orgullu atu apoia papél lideransa Governu Timor-Leste ne’ebé forte iha assuntu”, tenik Philipa Venning.
Aplikasaun “hamahon” halibur informasaun detallu kona-ba servisu hotu ne’ebé disponivel ba feto no labarik vítima violénsia sira. Aleinde ida ne’e, Lansamentu Aplikasaun ne’e servisu hamutuk entre The Asia Foundation ho Australian Aid, Catalpa no Nabilan.
