Ministru Negósius Estranjeirus Japaun nian vizita Timor-Leste
Ministru Negósius Estranjeirus Japaun nian, Taro Kono, vizita Timor-Leste, iha loron 12 fulan-outubru tinan 2018, nu’udar vizita dahuluk husi Ministru Japaun nian ida mai país ne’e hafoin ninia independénsia.
Durante ninia vizita mai país ne’e, Taro Kono hala’o sorumutuk ho Prezidente Repúblika, Francisco Guterres Lú Olo, ho Primeiru-Ministru, Taur Matan Ruak no ho Ministru Negósius Estranjeirus no Kooperasaun iha ezersísiu, Agio Pereira, ho objetivu atu hametin liután relasaun bilaterál entre país rua ne’e.
Ministru Negósius Estranjeirus sira Timor-Leste no Japaun nian ne’e, asina ona akordu ida kona-ba fortalesimentu rekursu umanu nasionál sira liuhusi programa JDS (Japan Development Scholarships), programa kooperasaun Japaun nian ida ne’ebé hahú tiha ona iha tinan 1999, ne’ebé mak implementa tiha ona iha país 15 no sei fó dalan atu funsionáriu públiku timoroan sira bele estuda iha universidade japoneza sira. Agio Pereira hatete katak programa ida-ne’e importante “la’ós de’it iha prespetiva akadémika, maibé mós iha perspetiva dezenvolvimentu karákter no dixiplina”.
Ministru Japonés ne’e partisipa mós iha serimónia inaugurasaun ofisiál ba ponte datoluk iha mota Komoro, hinode-bashi (ponte lorosa’e iha lian japaun nian), ne’ebé ninia kriasaun no konstrusaun oferese husi Governu Japaun, ho folin besik dolar amerikanu millaun 26.
Taro Kono hateten katak “Japaun no Timor-Leste hanesan parseiru importante ne’ebé partilla valór báziku sira” no hakarak “atu kria hikas relasaun entre país rua no hasa’e relasaun sira-ne’e ba nivel foun ida”, “liuliu iha área kooperasaun nian haat, hanesan: dezenvolvimentu rekursus umanus, ekonomia, setór marítimu no kooperasaun rejionál”.
Agio Pereira, lori Timor Leste nia naran hato’o “agradesimentu kle’an ba Governu no povu japaun ba sira-nia amizade no apoiu ne’ebé maka fó ona ho laran ba Timor Leste liuhusi servisu di’ak husi JICA, Ajénsia Kooperasaun Internasionál Japaun nian, iha asisténsia ba dezenvolvimentu, iha kapasitasaun rekursus umanus, iha kriasaun bolsa estudu ba timoroan sira, iha formasaun ba kuadru defeza nian no jornalista sira, iha saúde no iha saneamentu, iha agrikultura no iha dezenvolvimentu rurál, nune’e mós projetu ba manutensaun no melloramentu infraestrutura xave sira iha Timor-Leste ”.
