Governu Timor-Leste

Ministeriu Reforma Lejislativa no Asuntu Parlamentar no programa Estadus Unidus, Millenium Challenge Corporation (MCC), kolabora hamutuk hodi organiza workshop, entre data 2 to’o 4 Outubru iha Komisaun Nasional Eleisoes (CNE), iha Dili, hodi deskuti kona-ba dezafiu dezenvolvimentu sira iha Timor-Leste hanesan programa parseria ba dezenvolvimentu nian.

Sorumutu refere, Semináriu hodi Analize kona-ba Limitasaun ba Dezenvolvimentu iha Timor-Leste (Timor-Leste Root Cause Analysis Workshop), iha motivu hodi haree ba konstranjimentu sira ne’ebe nasaun ne’e hasoru iha prosesu dezenvolvimentu ekonomia nian.

Inisiativu ne’e sai hanesan parte ida hosi lansamentu parseria dezenvolvimentu entre Governu Timor-Leste no Millennium Challenge Corporation (MCC)

MCC, sai hanesan ajensia asistensia independente ida ne’ebe hili ona Timor-Leste hodi elejivel hanesan parseria – programa bo’ot durante tinan-lima nia laran. Hanesan parte ida hosi prosesu parseria dezenvolvimentu, semináriu refere sei identifika no konfirma problema espesifiku ne’ebe povu Timor-Leste hakarak atu hato’o tuir tarjetu investimentu no atividade sira seluk.