Governu Timor-Leste

Ministru Reforma Lejizlativa no Asuntus Parlamentares, Fidelis Manuel Leite Magalhães hala’o sorumutuk ho Prezidente Konsellu Administrasaun Banku Nasionál Komérsiu Timor-Leste (BNCTL, sigla iha lian portugés), Brígido de Sousa, akompaña husi nia Vise-Prezidente, António Florindo Abrantes. Sorumutuk ne’e hala’o iha Palásiu Governu, iha loron 14 fulan-setembru tinan 2018.

BNCTL ne’e harii hahú ho Instituto de Microfinanças de Timor-Leste (IMFTL) [Institutu Mikrofinansas Timor-Leste nian (IMFTL)] no sai ona nu’udar banku da-huluk Timor nian bainhira, iha loron 11 fulan-jullu, tinan 2011,  nia hetan lisensa bankáriu sein restrisaun ho kapitál ida hamutuk osan dólar amérika millaun $10.

Ministru, reprezentante Governu hanesan asionista BNCTL nian ne’e, informa katak sorumutuk ne’e hala’o atu prepara ba realizasaun Asembleia Jerál Banku ne’e nian ne’ebé sei realiza iha loron 25 fulan-setembru tinan 2018. Ministru ne’e esplika tan katak, iha Asembleia ne’e, bazeia ba análize kona-ba relatóriu anuál BNCTL nian, sei foti desizaun-xave sira, ne’ebé fundamentál ba dezenvolvimentu Banku ne’e nian.

Brígido de Sousa, iha fatin hanesan, aprezenta progresu ne’ebé hala’o ona no dezafiu sira ne’ebé Banku ne’e hasoru, inklui mos solusaun balun ne’ebé sira hetan ona. Nia hatutan mós katak, Ministru Fidelis Magalhães hato’o mos ideia balu ne’ebé iha relasaun ho servisu sira ne’ebé maka BNCTL tenke hala’o, hodi kumpre ninia knaar nu’udar instituisaun finanseira Estadu nian, ne’ebé ninia servisu sira tenke to’o ba iha populasaun tomak.