Governu Timor-Leste

Sekretáriu Estadu Komunikasaun Sosiál (SEKOMS), Merício Juvenal dos Reis “Akara” hala’o sorumutu ho Na’in ba Media sira, hodi ko’alia kona-ba kondisaun real ne’ebé media sira enfrenta. Sorumutu ne’e hala’o iha Palásiu Governu, loron 13 fulan-setembru tinan 2018.

Iha sorumutu ne’e na’in ba media sira aprezenta kondisaun aktuál media sira iha Timor-Leste, liga liu ba iha nível finanseiru, Infraestrutura, Rekursus Umanu, Ekipamentu no mós vensimentu jornalista sira-nia.

Merício Akara hateten, Governu sempre iha komprimisu atu konsidera Media hanesan Parseiru estratéjiku ba prosesu demokratizasaun iha ita-nia rain, atu desemina informasaun ba sidadaun hotu no mós atu promove transparénsia iha ita-nia rain, ho nune’e bele fo mós informasaun ne’ebé efetivu, Inspirativu no motiva Jovem sira atu halo planu ba vida di’ak liu.

Iha parte seluk, Diretór Business-Timor, José ximenes hateten preokupa ho kondisaun media sira tanba tuir observasaun iha media balun hahú hamenus ona ninia pájina publikasaun no balun hamenus ona trabalhadór (Jornalista) sira, tanba ne’e Na’in ba Média no diretór sira husu Governu atu tau hanoin hamutuk oinsá  bele ultrapassa faze krítika ida.

Na’in ba media no Diretór sira ne’ebé partisipa iha sorumutu ne’e mai hosi jornál  STL, GMN TV,  jornál Timor Post, jornál Business Timor no jornál Independente.