Governu Timor-Leste

Misaun Apoiu nian ba Prosesu Eleitorál iha Giné-Bisau hala’o ona, iha loron 11 no 12 fulan-setembru, vizita dahuluk ba país ne’ebá iha ámbitu eleisaun ne’ebé sei hala’o iha loron 18 fulan-setembru oinmai.

Misaun Timor nian ne’e lidera husi Tomás Cabral, ne’ebé simu nomeasaun husi Governu hanesan Reprezentante Espesiál Governu RDTL nian ba Repúblika Giné-Bisau atu halo identifikasaun kona-ba nesesidade Estadu ne’ebá nian atu hala’o eleisaun ne’ebé livre no demokrátika. Timor-Leste fó ona apoiu ba Giné-Bisaun iha eleisaun tinan 2014 nian, hodi kontribui ba preparasaun prosesu eleitorál nian, liu-liu faze resenseamentu eleitorál, fundamentál ba rezultadu ne’ebé demokrátiku kredivel, bele la’o ho dalan ne’ebé justu, transparente no hetan rekoñesimentu nasionál no internasionál.

Reprezentante espesiál ne’e hala’o sorumutuk ho Primeiru-Ministru Giné-Bisau nian, Aristides Gomes, iha sede Ajénsia Kooperasaun Timor-Leste (AKTL) nian iha Giné-Bisau, ho objetivu atu ko’alia kona-ba resposta Governu Timor-Leste nian ba pedidu husi Governu Repúblika Giné-Bisau kona-ba apoiu ba eleisaun lejizlativa tinan ida-ne’e nian.

Iha sorumutuk ne’e, Xefe Governu Giné-Bisau nian agradese ba prontidaun husi Governu Timor nian atu tulun Giné-Bisau iha Prosesu eleitorál no agradese mós ba apoiu Timor-Leste nian durante eleisaun tinan 2014, ne’ebé kontribui ba estabilizasaun país ne’ebá nian. Durante sorumutuk ne’e, Tomás Cabral entrega ona karta ida husi Primeiru-Ministru, Taur Matan Ruak, ba ninia omólogu husi Giné-Bisau.

Hafoin sorumutuk iha AKTL, Tomás Cabral, Aristides Gomes no delegasaun sira seluk halo vizita ba Gabinete Tékniku Apoiu nian ba Prosesu Eleitorál (GTAPE) atu haree ekipamentu ne’ebé Timor-Leste entrega iha prosesu eleitorál tinan 2013 no 2014 nian.

Tomás Cabral vizita mós Prezidente Repúblika Giné-Bisau nian, José Mário Vaz, hodi ko’alia kona-ba prosesu eleitorál tinan 2018 nian. Prezidente Giné-Bisau nian ne’e agradese tebtebes ba povu Timoroan, ne’ebé solidáriu nafatin ho ninia país maun-alin ne’e. José Mário Vaz, aprezenta mós kumprimentus ba eis-Prezidente Repúblika Timor-Leste, Kay Rala Xanana Gusmão, no entidade Timoroan hotu ba sira-nia apoiu iha eleisaun sira liubá ne’e no apoiu ba prosesu eleitorál tinan 2018 nian.

Reprezentante Espesiál Timor-Leste nian ne’e hala’o mós sorumutuk ho Ministra Administrasaun Territoriál Giné-Bisau nian, Ester Fernandes, ho Diretór Jerál GTAPE no ho Jenerál Biague Na N’Tam hodi diskute kestaun téknika sira kona-ba atu organiza prosesu eleitorál ne’e. Tomás Cabral hala’o mós vizita kortezia ida ba eis-Xefe Estadu-Maiór Jenerál Forsas Armadas Giné-Bisau nian, António Indjai.

Molok fila-fali mai Timor-Leste, Tomás Cabral hala’o sorumutuk iha Lisboa, iha loron 13 fulan-setembru, ho Sekretáriu-Jerál G7+ nian, Helder da Costa hodi diskute kona-ba preparativu sira ba prosesu eleitorál iha Giné-Bisau iha ámbitu CPLP no husi G7+ nian.