Governu asina Memorandu Entendimentu ba Konservasaun no Jestaun kona-ba dugongu
Sekretáriu Estadu Ambiente nian, Demétrio de Amaral de Carvalho, asina ona Memorandu Entendimentu ida ho Konvensaun kona-ba Espésie Migratória sira (CMS) ba konservasaun no jestaun kona-ba dugongu no ninia abitat sira, iha loron 10 fulan-setembru, iha Palásiu Governu iha Dili.
Serimónia asinatura ba memorandu ne’e konta mós ho partisipasaun husi Ministru Agrikultura no Peskas, Joaquim José Gusmão dos Reis Martins, Sekretáriu Estadu ba Komunikasaun Sosiál, Merício dos Reis “Akara”, responsavel ba jestaun kona-ba programa Dugong MOU husi CMS, Donna Kwan, Diretór Jerál Peskas, Diretór Jerál Meiu Ambiente, no reprezentante sira husi Ministériu Agrikultura no Peskas no Sekretaria Estadu Ambiente.
Memorandu Entendimentu ba Konservasaun no Jestaun kona-ba Dugongu no ninia Abitat tomak (Dugong MOU) buka atu promove asaun internasionál sira ne’ebé koordenada atu garante sobrevivénsia dugongu nian no ninia abitat ba tempu naruk. Dugong MOU hahú vigora iha loron 31 fulan-outubru tinan 2007 iha Abu Dhabi, iha Emiradus Árabes Unidus.
Dugong MOU rekoñese katak dugongu moris namkari iha área ne’ebé luan, ne’ebé kobre tasi-ibun 140.000 km iha país 40 resin iha rejiaun Indo-Pasífiku, hahú kedas husi tasi-ibun parte loro-sa’e Áfrika nian to’o ba illa sira iha Pasífiku Osidentál. Dugong MOU aumenta tan valór ba programa konservasaun nasionál, ne’ebé fasilita troka informasaun importante sira, hodi promove adosaun no/ka adaptasaun prátika di’ak-liu husi país no sub-rejiaun partisipante sira-seluk, hodi fornese servisu no produtu ba Estadu sira ne’ebé asina Memorandu ne’e atu aumenta kapasidade konservasaun dugongu nian, espésie ne’ebé iha risku bele lakon.
Durante serimónia ne’e, Sekretáriu Estadu Ambiente, hodi Governu Timor-Leste nia naran, agradese ba CMS ba ninia serbisu iha konservasaun espésie migratória sira no ba ninia apoiu no dedikasaun ba protesaun no konservasaun dugongu no ninia abitat iha Timor-Leste. Na’i-ulun ne’e mós sente haksolok no orgullu tanba Timor-Leste mós halo parte iha grupu nasaun 27 ne’ebé asina memorandu ne’e, hodi afirma fila-fali kompromisu Timor-Leste nian ba protesaun dugongu no ninia abitat.
Ministru Agrikultura no Peskas, iha ninia intervensaun, salienta katak Memorandu Entendimentu ne’e sei permite Timor-Leste atu aumenta ninia koñesimentu no rekursu ba protesaun ninia espésie tasik sira, rekursu nasionál ne’ebé bele nakfilak ba atrasaun turístika importante ida. Nia hatete mós katak Ministériu Agrikultura no Peskas, liuhusi Diresaun-Jerál Peskas nian, dezenvolve ona ezbosu finál ida kona-ba Polítika Nasionál kona-ba Tasi ba Timor-Leste ho objetivu prinsipál atu jere dezenvolvimentu ekonómiku tasik liuhusi kuadru legál no lejizlasaun nasionál ida, atu nune’e bele proteje rekursu tasik sira no hametin kooperasaun internasionál iha rejiaun Ázia-Pasífiku no iha nivel globál.
Donna kwan, husi CMS, sente haksolok tanba formalmente simu ona Timor-Leste iha família Dugong MOU nian, hanesan país signatáriu da-27. Nia salienta kona-ba faktu katak Timor-Leste kompromete ona ho konservasaun globál, liuliu liuhusi partisipasaun iha projetu konservasaun dugongu no du’ut tasik husi Fundu Mundiál ba Ambiente (GEF- sigla iha lian inglés), ba ida ne’ebé Timor-Leste fó ona kontribuisaun signifikativu ida ba esforsu internasionál sira kona-ba konservasaun dugongu no du’ut tasik.
