Governu felisita Fransisco Guterres Lú Olo ba nia aniversáriu da-64
Primeiru-Ministru, Taur Matan Ruak, haruka ona karta felisitasaun nian ida ba Prezidente Repúblika, Fransisco Guterres Lú Olo, ne’ebé ohin selebra ninia tinan ba dala 64.
Fransisco Guterres Lú Olo moris iha loron 7 fulan-setembru tinan 1954, iha Osú, iha Distritu Vikeke.
Iha loron 20 fulan-maiu tinan 2017, iha tuku 12 kalan, Lú Olo simu pose hanesan Prezidente Repúblika Demokrátika Timor-Leste VI (Prezidente IV hafoin restaurasaun independénsia Timor-Leste nian iha loron 20 fulan-maiu tinan 2002).
Primeiru-Ministru hodi nia naran no Governu Konstitusionál VIII nia naran hato’o “kaloroza felisitasaun no sinseru votus parabéns nian”, ba Prezidente Repúblika.
Taur Matan Ruak sente “haksolok tebes tanba bele asosia an ho data selebrasaun nian ne’e, ne’ebé marka loron moris husi amigu no antigu kombatente ida ne’ebé dedika ninia moris hodi defende Povo Timoroan no luta ba Libertasaun Nasionál, ho ninia sakrifísiu pesoál ne’ebé boot tebes”.
Xefe Governu dezeja ba Prezidente Repúblika “atu moris tinan barak liután ho vida ne’ebé nakonu ho dame, domin, armonia, saúde no susesu pesoál, família no públiku, liuliu iha ninia funsaun nobre sira hanesan Prezidente”.
Primeiru-Ministru hakotu hodi afirma katak “mensajen badak ne’e hanesan omenajen justa ida ne’ebé Governu Konstitusionál VIII hato’o ba Prezidente Repúblika, ba ninia responsabilidade boot ne’ebé tula hela iha nia kabaas”.
