Governu asina livru kondolénsia nian atu hanoin fila-fali Kofi Annan
Membru sira Governu Konstitusionál VIII nian, asina ohin, loron 5 fulan-setembru tinan 2018, livru kondolénsia nian ba eis-Sekretáriu-Jerál Organizasaun Nasoins Unidas, Kofi Annan nia mate. Nia hakotu iis iha loron 18 fulan-agostu liubá.
Kofi Annan dirije Nasoins Unidas husi tinan 1997 to’o 2006 no simu Prémiu Nobel Pás nian iha tinan 2001. Sekretáriu-Jerál Organizasaun Nasoins Unidas nian dahituk ne’e, durante ninia mandatu, dinamiza enkontru trilaterál sira entre ONU, Indonézia no Portugál atu rezolve konflitu iha Timor-Leste, ne’ebé loke dalan ba realizasaun referendu ne’ebé maka determina independénsia Timor-Leste nian.
Parlamentu Nasionál aprova ona iha loron 23 fulan-agostu, ho lian ida-de’it, Votu Pezár ida ba Kofi Annan nia mate no iha loron 19 fulan-agostu, Primeiru-Ministru, Taur Matan Ruak, aprezenta ona kondolénsia lori Governu no Povu Timoroan tomak nia naran, hodi hatete katak “ninia memória sei liga ba nafatin ba istória Timor-Leste nian, tanba ninia serbisu ne’ebé la hatene kolen atu hetan rekoñesimentu internasionál ba direitu ita-nia Povu nian ba autodeterminasaun, no hafoin konsulta popular ne’ebé determina ita-nia Nasaun nia independénsia, hatuur ona baze sira iha ne’ebé konstrusaun Estadu Timor nian agora ne’e hatuur ba.
Livru ho mensajen husi membru Governu sira ne’e sei entrega ba responsável másimu Programa Nasoins Unidas nian ba Dezenvolvimentu (PNUD, Sigla iha lian Portugés) iha Timor-Leste, Claúdio Providas, atu bele lori ba entrega iha sede Organizasaun Nasoins Unidas nian.
