Serimónia lansamentu ba konstrusaun Portu Tibar
Serimónia lansamentu ba konstrusaun Portu Tibar hala’o iha loron 30 fulan-agostu, loron iha ne’ebé komemora tinan da-19 Konsulta Populár ne’ebé maka determina independénsia Timor-Leste nian no sai nu’udar momentu desizivu ida ne’ebé fundamentál iha Nasaun ne’e nia istória.
Terminál nivel internasionál ida-ne’e sei harii iha parte loro-monu Dili nian ho distánsia kilómetru 10, iha tasi-dilan Tibar iha Minisípiu Likisá, liuhusi Timor Port SA, parseria públiku-privada (PPP) ida entre konsórsiu Bolloré no Governu Timor-Leste.
Primeiru-Ministru, Taur Matan Ruak, hateten katak “dezenvolvimentu infraestrutura portu nian konsidera esensiál ba futuru Timor-Leste nian” no defende katak “Portu sira ne’e la’ós de’it fatin ida ba movimentu merkadoria ka sasán sira nian, maibé mós, sai nu’udar sentru dezenvolvimentu nian ida ne’ebé di’ak ba negósiu sira no ba kriasaun empregu, bele impulsiona kreximentu husi komunidade sira ne’ebé hela iha ne’ebá”. Xefe Governu ne’e hatutan mós katak Portu Tibar sei fó “kondisaun nesesáriu sira atu nune’e Timor-Leste bele transforma an iha futuru hanesan interface (Hub) rejionál ida ba transporte merkadoria no tránzitu kontentór sira nian, nune’e bele prodús rendimentu adisionál sira ba país ne’e.”
Taur Matan Ruak hatete mós katak ho “implementasaun Projetu Portu ne’e nian, liuhusi Parseria Públiku-Privada (PPP) ida, ne’ebé reprezenta investimentu ida ho dimensaun boot liu ne’ebé halo ona, to’o agora, iha infraestrutura públika sira iha país ne’e”, Governu fó hela “sinál ida ba investidór sira seluk, katak Timor-Leste ne’e fatin atrativu ida atu halo negósiu”.
Primeiru-Ministru afirma katak nia fiar metin “projetu ne’e sei dezenvolve ho impaktu ambientál sira ne’ebé sei haree didi’ak mós “tanba “implementasaun husi medida boot sira mitigasaun nian, ne’ebé hili ona ba projetu ida-ne’e tuir prátika ambientál hirak ne’ebé di’ak liu no tuir norma sira husi Korporasaun Finanseira Internasionál (IFC, sigla iha lian inglés) ka Banku Mundiál” no tanba “projetu ne’e fó ba Bolloré, operadór portuáriu ida mós husi hirak ne’ebé iha prestíjiu boot iha nivel mundiál”.
Phillip Jullien no Cyrill Dumon, husi grupu Bolloré, hatete katak konstrusaun Portu Tibar, “projetu boot liu hotu grupu ne’e nian iha Ázia”, “sei permiti hamenus kustu husi importasaun no fasilita esportasaun” hodi hatutan katak loron ida-ne’e marka “inísiu husi era ekonomia nian foun ida ba Timor-Leste, ne’ebé sei lori benefísiu ba timoroan hotu-hotu”.
Kong Qi, husi China Harbour, empreza ida ne’ebé responsabiliza konstrusaun projetu ne’e nian, kompromete an atu kria empregu 500 resin durante konstrusaun Portu iha tinan tolu oinmai.
Marka prezensa iha serimónia ne’e membru Governu balu, Prezidente Parlamentu Nasionál, Arão Noé Amaral, Eis-Prezidente Repúblika, Xanana Gusmão, korpu diplomátiku, parseiru dezenvolvimentu sira no emprezáriu nasionál no internasionál sira.
Ba atu lee diskursu Primeiru-Ministru, Taur Matan Ruak, nian klike iha ne’e.
