Governu hato’o kondolénsia ba Keith Hayes nia mate
Governu Repúblika Demokrátika Timor-Leste nian haruka ona ninia sinsera kondolénsia ba família 2º/2º Komandu Keith Hayes, belun di’ak, maun no kamarada povu no Veteranu sira Timor-Leste nian.
Portavóz Governu Konstitusionál VIII nian, Ministru Agio Pereira, hatete: “Governu no Veteranu sira Timor-Leste nian triste ho notísia kona-ba Komandu Keith Hayes nia mate, ho tinan 97. Nia maka mate-restu soldadu penúltimu husi ninia unidade.
“Nia maka soldadu Keith Hayes, husi Komandu 2ª/2ª Kompañia Independente bainhira tama ba dala uluk iha Timor-Leste durante Funu Mundiál da-2. Nia hetan kastigu ba mate nian (ezekutadu), hetan tiru ho kilat ahi (fuziladu) no fai nia ho surik kilat nian (baionetadu), hamutuk ho soldadu australianu sira seluk, husi forsa imperiál japoneza invazora sira no husik hela nia tanba hanoin katak nia mate ona.
“Feto timoroan lokál ida, Señora Berta Donnabella Martins simu nia iha ninia uma no tau matan ba nia saúde. Lori nia ba ailaran ba fatin ida-ne’ebé ninia kolega soldadu sira halo hela funu guerilla hasoru forsa japoneza sira”.
“Nia la haluha Señora Martins no tara hela señora ne’e ninia retratu iha fatin importante ida iha Keith nia uma”.
Keith la haluha di’ak hotu no Señora Martins nia aten-barani no timoroan barak ne’ebé ho aten-barani lakon sira-nia moris hodi tulun nia no ninia maluk sira ´Diggers´. Sira hala’o sira-nia moris hodi fó onra ba tusan hirak ne’ebé maka sira hotu-hotu sente ba timoroan sira.
Keith mantein kompromisu importante ida-ne’e no nia hatudu kompromisu ne’e liuhusi forma barak.
Hafoin funu ne’e, Keith ajuda kria 2/2 Commando Association, ne’ebé agora lidera husi família sira Komandu nian, unidade elite dahuluk Austrália nian. Barak liu maihusi Perth, nune’e mós Keith, iha ne’ebé SAS elite ne’e mós hahú ba no iha nia kuartél-jenerál.
Veteranu timoroan sira rasik koñese soldadu Keith Hayes, bainhira, iha tinan 95, nia lidera Marxa Loron ANZACs iha luron Perth nian, akompaña husi lider veteranu Timor-Leste nian, Maun Boot Kay Rala Xanana Gusmão, no husi kompañeiru Veteranu sira Timor-Leste nian iha loron 25 fulan-abríl tinan 2014.
“Ligasaun ne’ebé kria entre veteranu sira Timor-Leste no veteranu sira Austrália nian ne’e forte tebes ho hanoin di’ak no kamaradajen ne’ebé soldadu mate-restu sira sente hanesan Keith”.
“Ligasaun ne’ebé halo ho ita-nia belun di’ak no viziñu, Austrália, bele fó ba ema ne’ebé maka ho onra boot hanesan Keith”.
Ministru Agio Pereira konklui: “Adeus soldadu Keith Hayes, husi ó-nia maun-alin no bin-alin sira timoroan – ne’ebé mak ami sei la haluha – deskansa iha dame rohan laek”.
Repúblika Demokrátika Timor-Leste sei reprezenta husi Embaixadór Timor-Leste nian iha Austrália, S.E. Sr. Abel Guterres, iha funerál Keith nian, iha kinta, loron 30 fulan-agostu, iha Semitériu Karrakatta – Norfolk Chapel Perth, Austrália Osidentál.
