Governu Timor-Leste

Proposta kona-ba Orsamentu Jerál Estadu (OJE) nian ba 2018 hetan ona aprovasaun husi Parlamentu Nasionál iha jeneralidade, iha kalan, loron 29 fulan-agostu nian, ho votu afavór 53, abstensaun 12 no laiha votu kontra.

Parlamentu, agora sei ba konsidera orsamentu ne’e iha espesialidade no diskute no vota ba kada artigu husi projetu lei ne’e nian molok atu ba vota iha finál globál, ne’ebé sei hala’o iha loron 6 fulan-setembru.

Primeiru-Ministru, Taur Matan Ruak, iha nia diskursu taka plenáriu loron tolu ne’e nian, agradese ba membru Parlamentu Nasionál ba sira-nia “partisipasaun séria, konstrutiva no esforsu tomak durante debate iha jeneralidade ne’e”, hodi espresa “Governu Konstitusionál VIII ninia vontade firme atu kontinua serbisu ho Parlamentu Nasionál, iha debate iha espesialidade, atu nune’e bele hetan konsensu ne’ebé presiza atu alterasaun sira ne’ebé maka hatama ona iha proposta lei ne’e bele hatudu kualidade ida-ne’ebé di’ak liután iha versaun finál.

Durante debate iha plenáriu, Komisaun C Parlamentu Nasionál, ne’ebé maka hetan knaar atu analiza kona-ba finansas públikas, aprezenta ninia relatóriu. Hafoin sesaun pergunta no debate kona-ba kestaun sira ne’ebé foti, deputadu sira aprezenta alterasaun sira ba lei ne’e.

Taur Matan Ruak hateten klaru mós katak elaborasaun proposta kona-ba OJE ne’e “hala’o iha kondisaun sira ne’ebé susar tanba presiza atu asegura ninia aprezentasaun, iha tempu ne’ebé badak tebes, menus husi loron neenulu, hafoin simu pose”, hodi justifika katak aprezentasaun ne’e urjente “la’os de’it tanba ita tenke asegura meiu finanseiru no orsamentál sira ne’ebé presiza ba prestasaun di’ak servisu públiku nian, maibé mós atu hatuur fali, lalais, fiar iha ita-nia ekonomia, liu-liu husi setór privadu ne’ebé maka depende liu ba investimentu ka despeza Estadu nian”.

Primeiru-Ministru remata ninia intervensaun hodi dezeja atu Governu no Parlamentu Nasionál bele hamutuk “hetan solusaun sira ne’ebé adekuada no presiza liu, atu ita fila-fali lalais ba dalan kreximentu ekonómiku, melloria kondisaun moris ita-nia Povu nian no dezenvolvimentu sustentavel husi ita-nia Pátria ne’ebé ita hadomi”.

Atu lee notísia kona-ba inísiu diskusaun OJE 2018 nian, klike iha-ne’e.

Atu lee diskursu Primeiru-Ministru nian kona-ba aprezentasaun OJE, klike iha-ne’e.

Atu lee diskursu Primeiru-Ministru nian kona-ba enserramentu husi aprezentasaun OJE, klike iha-ne’e.