Governu asina akordu subvensaun anuál ho Konferénsia Episkopál Timorense
Primeiru-Ministru, Marí Alkatiri, no Prezidente Konferénsia Episkopál Timorense, Bispu Dom Basílio do Nascimento, ohin, loron 10 fulan-maiu durante Sorumutuk Konsellu Ministrus nian, asina ona akordu ida ne’ebé difine atribuisaun husi parte Governu, kona-ba subvensaun anuál ho nia valór totál millaun sanulu-resin lima dólar amerikanu ba tinan finanseiru 2018 ba hala’o atividade sira iha área sosiál, edukasaun no governu eklesiál nian.
Akordu ida-ne’e, selebra tuir Akordu-Kuadru ne’ebé mak asina ona iha loron 16 fulan-juñu tinan 2017, hodi define regra sira parseria nian ba selebrasaun akordu anuál sira subvensaun nian ba transferénsia verba sira husi Orsamentu Jerál Estadu ba Konferénsia Episkopál Timorense, hanesan prevee ona iha Akordu entre Repúblika Demokrátika Timor-Leste no Santa Sé.
Akordu ne’e, ohin asina ona iha prezensa membru Governu Konstitusionál VII nian, Dom Virgílio do Carmo da Silva, Bispu Dioseze Dili, no Dom Norberto do Amaral, Bispu Dioseze Maliana, prevee katak faze dahuluk ho valór millaun lima dolar amerikanu sei transfere iha fulan oinmai iha loron 1 fulan-juñu tinan 2018, no faze daruak sei transfere kedas bainhira Lei Orsamentu Jerál Estadu tinan 2018 nian tama iha vigor.
Área sosiál no edukativa sei hetan benefísiu liu husi akordu ida ne’e, no prevee ona liu millaun sanulu-resin ida ba ninia implementasaun, tuir polítika públika sira ne’ebé mak aprova ona husi Governu no ho valór no prinsípiu sira Igreja Katólika nian.
Durante serimónia ne’e, Bispu Dom Basílio do Nascimento deklara katak akordu ida ne’e sei aliña ho “devér Governu nian hodi apoiu misaun Igreja Katólika iha Timor-Leste.” no atu “reforsa konfiansa Governu nian iha Igreja Katólika, hodi hala’o iha parseria ho serbisu ne’ebé mak ita hala’o ba povu”.
Primeiru-Ministru, Marí Alkatiri, hateten katak “ nia haksolok hodi asina akordu ida ne’e, atu kumpre saida mak estabelese ona iha Konkordata ne’ebé asina ona iha tinan tolu liubá” ho garantia katak Governu Konstitusionál VII, maski ho difikuldade hirak ne’ebé maka hasoru husi rejime duodésimál, Na’i-Ulun ne’e la haluha ninia kompromisu sira ho Igreja Katólika”.
