Governu asina kontratu ba fornesimentu fibra ótika iha Administrasaun Públika
Primeiru-Ministru, Marí Alkatiri, asina ona kontratu ida ho Timor Telekom (TT) kona-ba fornesimentu, instalasaun no konfigurasaun rede interna fibra ótika nian, iha loron 20 fulan-marsu, iha Palásiu Governu, iha Dili.
Ligasaun rede fibra ótika nian ne’e sei halo liuhusi subestasaun sira Eletrisidade Timor-Leste (EDTL) nian ba edifísiu Administrasaun Munisipál sira iha Munisípiu 12, ne’ebé liga ba Sentru Dadus Gabinete Primeiru-Ministru nian, hodi permite Governu kria ninia rede privada rasik.
Infraestrutura ne’e sei permite mós lansamentu Governu Elektróniku, ne’ebé sei hala’o iha tempu badak, hodi lori sidadaun sira besik liután ba Administrasaun Públika, liuhusi dezenvolvimentu governasaun eletrónika no modernizasaun admnistrativa ba servisu públiku sira.
Rede doméstika fibra ótika nian ne’e sei permite mós interligasaun ho fiu tasi-okos [cabo submarinho] ne’ebé sei to’o iha Timor-Leste, tuir akordu ne’ebé asina ona iha loron 19 fulan-marsu entre Governu no empreza sira ne’ebé sai responsavel ba projetu ne’e.
Responsavel TT, Capitão Amaro, hateten katak “elaborasaun no preparasaun projetu ne’e nian hala’o husi kuadru timoroan sira ne’ebé kualifikadu husi TT, ne’ebé hatudu kompeténsia no kualifikasaun husi kuadru timoroan sira”.
Primeiru-Mistru ko’alia liu kona-ba “importánsia husi rede interna fibra ótika nian ba Administrasaun Públika, hodi loke odamatan ba Governu eletróniku, ne’ebé sei signifika Governu ida ne’ebé efisiente, efikás, no liuliu, transparente liután!”
Partisipa iha serimónia ne’e, Ministru-Adjuntu Primeiru-Ministru nian ba Asuntu Governasaun, José Reis, Vise-Ministru Dezenvolvimentu ba Transportes no Komunikasoins, Inácio Moreira, no reprezentante sira husi setór telekomunikasaun nian.
