Governu lansa projetu alargamentu emisaun billete identidade ba Munisípiu hotu-hotu
Iha loron 2 fulan-fevereiru, iha Munisípiu Likisá, realiza ona serimónia lansamentu ba alargamentu emisaun billete identidade ba Munisípiu Aileu, Ainaru, Likisá, Manatutu, Manufahi no Vikeke.
Projetu ne’e responsabiliza husi Ministériu Justisa, ho apoiu husi Uniaun Europeia no husi Camões-Instituto da Cooperação e da Língua.
Iha ninia intervensaun, Ministra Justisa, Maria Ângela Carrascalão, hateten katak Timor-Leste “antes ne’e iha de’it sertidaun moris nian, no sei falta hela billete identidade”. Ministra ne’e dehan tan katak “ida-ne’e hanesan mós hakat ida ba desentralizasaun administrasaun públika Timor nian no konsolidasaun Estadu direitu nian”
“Ita nu’udar timoroan. Sente satisfeitu tebes ho hakat ba legalidade nian ida-ne’e no ohin ita orgullu hodi halo hakat ida tan atu to’o ba Estadu direitu ida ne’ebé loloos”, hateten Ministra Justisa.
Sekretáriu Administradór Munisípiu Likisá ninian, Renato Nunes Serrão, iha fatin hanesan, esplika katak objetivu husi sistema ne’e maka loke dalan ba komunidade atu oinsá bele hetan billete identidade nian liuhusi dalan ne’ebé simples no lalais liután.
Iha serimónia ne’e marka mós prezensa Ministru Prezidénsia Konsellu Ministrus, Adriano do Nascimento, Embaixadór Portugál nian iha Dili, José Pedro Machado Vieira, Komandante Jerál PNTL, Julio da Costa Hornay, autoridade lokál sira no diretór sira husi ministériu oioin.
