Governu Timor-Leste

Iha tersa, loron 6 fulan-fevereiru, iha semináriu ida ho tema “Lidera Transformasaun Dijitál iha País Áfrika sira ne’ebé Ko’alia Lian Portugués no Timor-Leste”, ne’ebé hala’o iha sala Maubara, iha Timor Plaza, iha Dili.

Semináriu ne’e organiza husi Ministériu Justisa ho apoiu husi Projetu Apoiu ba melloria Kualidade no Proximidade ba Servisu Públiku sira husi PALOP no Timor-Leste (PASP/PALOP-TL), projetu ida ne’ebé hala’o hela iha nasaun ne’e liuhusi serbisu hamutuk ho Governu Timor nian ho objetivu atu aumenta no hadi’a prestasaun servisu públiku ba ema no organizasaun sira.

Eventu ne’e ninia objetivu mak atu diskute ho forma ativa, dinámika no abrajente kona-ba transformasaun dijitál iha setór públiku, hodi fahe esperiénsia konkreta no polítika públika estratéjika sira ne’ebé país barak maka tuir iha implementasaun estratéjia sira kona-ba Governu dijitál.

Primeiru-Ministru, Marí Alkatiri, iha ninia diskursu maklokek nian, dehan katak “Timor-Leste la’o hela atu sai nasaun ida ho administrasaun eletrónika dijitál ida ne’ebé efisiente no efikás”, hodi hatutan katak iha Timor-Leste iha ona “sistema governasaun elektrónika oin-oin, iha servisu balun, hanesan jestaun finansas públikas no pagamentu sira ka baze dadus funsaun públika nian”.

Marí Alkatiri hateten mós katak transformasaun dijitál “implika la’ós de’it ba  teknolojia maibé, liuliu, ba kriasaun kondisaun infraestrutura no kriasaun rekursus umanus”.

Embaixadór Portugál nian, José Pedro Machado Vieira, hateten katak projetu ne’e ninia objetivu mak atu hadi’a servisu públika sira iha nivel nasionál no lokál, no salienta kona-ba importánsia husi prosesu alargamentu emisaun billete identidade  nian ne’ebé dadaun ne’e loke ona to’o distritu hotu-hotu iha nasaun laran.

Eventu ne’e konta mós ho intervensaun husi Enkaregadu Negósius nian husi Delegasaun Uniaun Europeia nian, Alexandre Zafiriou, ho aprezentasaun husi João Vasconcelos no Tiago Fernandes husi Organizasaun ba Kooperasaun no Dezenvolvimentu Ekonómiku (OKDE), Koordenadór Institutu Komunikasaun no Teknolojia (IKT) nian, Justino Fernandes, husi Koordenadór Jerál PASP/PALOP-TL, Diogo Franco, no ikusliu ho diskursu enseramentu nian husi Ministra Justisa, Maria Ângela Carrascalão.

Semináriu ne’e mós konta ho prezensa husi membru Governu sira, reprezentante sira husi korpu diplomátiku no membru sira husi setór públiku.