Governu Timor-Leste

Iha sesta, loron 2 fulan-janeiru liubá, hala’o serimónia selebrasaun da-17aniversáriu FALINTIL-Forsa Defeza Timor-Leste (F-FDTL) nian, iha Ministériu Defeza no Seguransa, iha Dili.

Bainhira hakat ba audiénsia, Prezidente Repúblika RDTL no Komandante Supremu Forsas Armadas nian, Francisco Guterres Lú Olo, hateten katak Timor-Leste “tenke kontinua kumpre knaar atu fó formasaun, treinu no moderniza ninia Forsa Defeza sira, tuir kritériu nesesidade no efisiénsia nian, sein haluha ezijénsia mundu ohin loron nian. Xefe Estadu fó hanoin mós katak presiza  promove la’ós de’it melloria husi kualifikasaun tékniku profisionál militár sira nian, maibé mós “medida sira ne’ebé garante asesu ba saúde, apoiu sosiál komplementár, ba ajustamentu sistema retributivu no ba progresaun iha karreira militár nian, ho objetivu atu halo F-FDTL sai kompetitivu liután kompara ho setór sosiedade timoroan nian sira seluk”. Prezidente Repúblika remata iha ninia diskursu hodi enkoraja Forsa Defeza Nasionál atu hahú halo esforsu tomak ho sentidu atu afirma “prinsípiu kultura militár, baze loloos husi instituisaun militár ida ne’ebé forte, ne’ebé importante tebe-tebes ba identidade no ba koezaun nasionál”.

Husi ninia parte, Xefe Estadu-Maiór Forsas Armadas, Maijór Jenerál Lere Anan Timur, iha ninia intervensaun hateten katak “iha ninia ezisténsia durante tinan 17, F-FDTL iha ona esperiénsia di’ak no aat ne’ebé sai ona hanesan lisaun moris nian ida ba futuru”, hodi ko’alia liu kona-ba nesesidade Forsas Armadas Timoroan sira nian atu mantein pozisaun ne’ebé neutru durante períodu eleisaun nian ne’ebé besik to’o daudaun.

Entre konvidadu sira ne’ebé partisipa iha serimónia ne’e maka Primeiru-Ministru, Marí Alaktiri, membru Governu sira husi Governu Konstitusionál VII, reprezentante husi Korpu Diplomátiku, membru PNTL sira no komponente sira husi Forsas Defeza Timor-Leste, veteranu no individualidade sira seluk.