Governu Timor-Leste

Ohin, loron 1 fulan-fevereiru, hala’o serimónia fó pose ba Prezidente foun Konsellu Administrasaun Rádiu Televizaun Timor-Leste (RTTL,E.P), Gil da Costa, iha edifísiu Palásiu Governu nian, iha Dili.

Eventu ne’e konta ho diskursu husi Prezidente Konsellu Administrasaun RTTL nian ne’ebé foin simu pose ne’e, no mós ho alokusaun husi Primeiru-Ministru, Marí Alkatiri.

Iha ninia intervensaun, Gil da Costa dehan katak nia sei halo buat hotu atu RTTL bele kumpre misaun atu hato’o informasaun ba públiku ho rigór no responsabilidade étika liuhusi serbisu hamutuk ho funsionáriu sira seluk empreza públika ne’e nian, tanba “laiha supermen, iha de’it maka ekipa super”.

Husi ninia parte, Primeiru-Ministru ko’alia liu kona-ba importánsia RTTL nian hodi hala’o ninia funsaun atu fó informasaun ba sidadaun sira “ho izensaun no imparsialidade tomak, la fraku atu hasoru presaun saida de’it”, no ba nesesidade atu empreza públika ne’e prodús reseita no jere reseita hirak ho forma ne’ebé efisiente no ho kuidadu. Na’i ulun ne’e remata ninia alokusaun hodi afirma katak RTTL, iha fulan hirak tuirmai, “sei haree liu ba kobertura notisioza kona-ba prosesu eleitorál, hodi akompaña partidu polítiku hotu-hotu ho forma imparsiál no objetivu,  labele halo tratamentu preferensiál ka diskriminatória”.

Iha serimónia ida ne’e marka mós prezensa Ministru Prezidénsia Konsellu Ministrus, Adriano do Nascimento, Sekretáriu Estadu Konsellu Ministrus no Komunikasaun Sosiál, Matias Boavida, Ministru Adjuntu Primeiru-Ministru nian ba Asuntu Governasaun, José Reis, Ministru Estadu no Ministru Rekursus Naturais, Mariano Sabino, Ministru Turizmu, Manuel Vong, Prezidente sesante Konsellu Administrasaun RTTL nian, Milena Abrantes Soares, no mós reprezentante husi órgaun komunikasaun nasionál no internasionál.