Diálogu ho Komunidade Rejiaun Administrativa Espesiál Oekusi Ambenu
Iha loron 27 fulan-janeiru tinan 2018 liubá, Governu hala’o sorumutuk ida hodi halo diálogu ho komunidade Rejiaun Administrativa Espesiál Oekusi Ambenu (RAEOA) nian, iha salaun Alfándega iha Palaban, Pante Makasar.
Durante diálogu ho komunidade ne’e, membru Governu sira ne’ebé lidera husi Primeiru-Ministru, Marí Alkatiri, iha oportunidade hodi esplika ba populasaun área prioritária haat ne’ebé estabelese ona iha Programa Governu nian (área sosiál, dezenvolvimentu infraestrutura, dezenvolvimentu ekonómiku no modernizasaun institusionál) no rona liuhusi reprezentante komunitáriu sira, preokupasaun no aspirasaun sira husi populasaun kona-ba futuru rejiaun ne’e no nasaun ne’e nian.
Primeiru-Ministru afirma durante nia intervensaun katak “iha tempu krize nia halo korresaun”, no hatutan katak “Governu nia objetivu mak atu Oekusi sai hanesan modelu dezenvolvimentu nian ba fatin sira seluk iha nasaun laran”.
Durante sorumutuk ne’e, Marí Alkatiri, garante katak iha osan sufisiente atu hala’o eleisaun antisipada, hatutan mós katak Governu hakarak eleisaun ne’e tenke hala’o lalais ona, karik bele no “sei hala’o estudu hamutuk ho STAE no CNE bainhira maka bele halibur kondisaun téknika sira atu organiza eleisaun atu nune’e bele informa ba Prezidente Repúblika data sira iha ne’ebé bele hala’o eleisaun ne’e”. Komunidade Oekusi Ambenu hateten katak sira prontu atu vota iha eleisaun antisipada oinmai, nune’e bele rezolve problema polítika atuál.
Aleinde Primeiru-Ministru, partisipa mós iha atividade ne’ebé organiza hamutuk ho Autoridade Rejiaun Administrativa Espesiál Oekusi Ambenu nian ne’e maka, Prezidente Substitutu Autoridade RAEOA, Arsénio Bano, Ministru iha Prezidénsia Konsellu Ministrus, Adriano do Nascimento, Ministru Adjuntu Primeiru-Ministru nian ba Asuntu Governasaun, José Maria dos Reis, Ministru Administrasaun Estatál, Valentim Ximenes, Vise-Ministru Administrasaun Estatál, José Anuno, Vise-Ministra Planu no Finansas, Sara Lobo Brites, Sekretáriu Estadu Konsellu Ministrus no Komunikasaun Sosiál, Matias Freitas Boavida, xefe suku sira, reprezentante husi Alfándega, PNTL, F-FDTL, CCI-TL, Igreja no sosiedade sivíl.
Sorumutuk ne’e remata tiha, Primeiru-Ministru hala’o mós vizita oioin hodi fiskaliza projetu sira ne’ebé hala’o iha Rejiaun Administrasaun Espesiál Oekusi Ambenu hodi avalia lala’ok husi obra hirak ne’ebé la’o hela ne’e.
