Governu Timor-Leste

Iha ámbitu Projetu Apoiu ba Melloria Kualidade no Proximidade ba Servisu Públiku sira husi PALOP no Timor-Leste (PASP PALOP-TL), maka sei hala’o serimónia entrega kareta no ekipamentu sira ne’ebé sei utiliza ba emisaun Billete Identidade, iha kinta, loron 1 fulan-fevereiru iha tuku 15:00, iha instalasaun Diresaun Nasionál Rejistu no Notariadu iha Ministériu Justisa, iha Dili.

Serimónia ida ne’e marka alargamentu husi servisu atendimentu públiku kona-ba emisaun Billete Identidade, atividade ne’ebé tama iha Projetu Nasionál Timor-Leste nian husi PAS PALOP-TL ho orsamentu hamutuk Euro 400.000, ne’ebé ninia objetivu mak atu asegura identifikasaun ba sidadaun sira no proteje sira-nia identidade pesoál iha munisípiu neen: Aileu, Ainaru, Likisá, Manatutu, Vikeke no Manufahi.

Serimónia ne’e sei prezide husi S.Exa Ministra Justisa, Maria Ângela Viegas Carrascalão, no sei konta ho prezensa husi S.Exa. Embaixadór Portugál, José Pedro Machado Vieira, no husi Enkarregadu ba Negósiu husi Delegasaun Uniaun Europeia nian, Alexandre Zafiriou.

Iha okaziaun ne’e, sei asiste mós husi S.Exa. Ministru Prezidénsia Konsellu-Ministrus, Adriano Nascimento no Vise-Ministra Negósius Estranjeirus no Kooperasaun, Adaljiza Xavier Magno, no mós husi Ministru Justisa, Sebastião Dias Ximenes, nune’e mós reprezentante husi Ministériu sira no husi Ordenadór Nasionál Fundu Europeu ba Dezenvolvimentu iha Timor-Leste, formalmente sei entrega mós ekipamentu oioin ne’ebé adkire ona iha ámbitu projetu ne’e nian, maka hanesan kareta foun rua ne’ebé sei monta ho komputadór, scanner, impresora no kámara dijitál sira ne’ebé sei utiliza atu fasilita prestasaun Servisu Públiku emisaun Billete Identidade nian ba sidadaun timoroan sira iha munisípiu sira hotu.

Iha sesta, loron 2 fulan-fevereiru, iha oras 15:00 iha instalasaun Diresaun Munisipál Rejistu no Notariadu iha Likisá, sei halo lansamentu formál ba Projetu Nasionál Alargamentu Emisaun Billete Identidade ba munisípiu 6, ne’ebé prezide husi S.Exa Ministra Justisa, iha aktu simbóliku iha ne’ebé sei hala’o emisaun dahuluk ba Billete Identidade ida ne’ebé sei utiliza meiu sira ne’e, iha Munisípiu Likisá.

Atu hetan esklaresimentu kona-ba dúvida sira bele kontaktu ho: Dra. Iriana Ximenes (Pontu Fokál Timor-Leste), irianafreitasdejesusximenes@gmail.com, +67077273797.

Projetu Apoiu ba melloria Kualidade no Proximidade Servisu Públiku sira nian iha PALOP no Timor-Leste maka hanesan projetu ida ne’ebé ko-finansiamentu husi Uniaun Europeia (EUR 4.800.000,00), iha ámbitu Fundu Europeu da-10 ba Dezenvolvimentu, no kofinansia no ezekuta husi Camões – Instituto da Cooperação e da Língua, I.P. (EUR 1.000.000,00). Supervizaun téknika ba projetu ne’e asegura husi Ajénsia ba Modernizasaun Administrativa, I.P. (AMA, I.P.).

Iha Timor-Leste, parseiru estratéjiku ba implementasaun husi PASP nian maka Diresaun Nasionál Rejistu no Notariadu husi Ministériu Justisa. Iha nasaun parseiru sira seluk maka INFOSI (Angola), NOSi (Kabuverde), CEVETEGE (Giné-Bisau), INTIC (Mosambike) no INIC (Saun Tomé no Prínsipe), aleinde entidade hirak ne’ebé sai nu’udar responsavel ba realizasaun projetu nasionál sira ne’ebé finansia husi PASP PALOP-TL.