Governu Timor-Leste

Prezidente Repúblika, Francisco Guterres Lú Olo, fó sai ona ohin, loron 26 fulan-janeiru tinan 2018, disolusaun ba Parlamentu Nasionál no halo konvokatόria eleisaun antesipada nian hanesan solusaun hodi rezolvekrize institusionál ne’ebé akontese daudaun ne’e iha país.

Desizaun ida-ne’e, fό-sai liuhusi transmisaun direta husi televisaun nasionál sira, ne’ebé anunsia iha Palásiu Prezidensiál Nicolau Lobato, iha Dili, iha audiénsia ida ne’ebé kompostu husi Prezidente Parlamentu Nasionál, Aniceto Guterres, Prezidente Tribunál Rekursu, Deolindo dos Santos, Xefe Estadu-Maiόr Jenerál Forsas Armadas, Majόr-Jenerál Lere Anan Timur, Provedόr Justisa, Silvério Pinto, deputadu sira husi Parlamentu Nasionál, reprezentante korpu diplomátiku sira, membru Governu, reprezentante Igreja Katόlika, reprezentante sosiedade sivíl, no seluseluk tán.

Xefe Estadu sei fiksa, iha tempu badak, data ba eleisaun antesipada foun, tamba lei eleitorál ne’ebé maka vigora hela prevee katak, iha kazu disolusaun Parlamentu Nasionál, Xefe Estadu “fiksa, hodi dekreta, loron eleisaun ba deputadu sira (…) mínimu molok loron neenulu”.

Ezekutivu atuál, hanaran fali Governu jestaun ida to’o iha tomada pose ba ezekutivu foun, maske durante períodu ne’ebé Parlamentu Nasionál disolvidu tiha ona, sei funsiona Komisaun Permanente husi Parlamentu Nasionál, ne’ebé prezide husi Prezidente Parlamentu Nasionál no kompostu husi vise-prezidente sira no deputadu sira ne’ebé indika hosi partidu polítiku sira ho asentu iha parlamentu, hakru’uk ba prinsípiu reprezentatividade.