Governu Timor-Leste

Ministru Estadu no Ministru Agrikultura no Peskas, Estanislau Aleixo da Silva no reprezentante Banku Mundiál, Macmilian Anyanwu, lansa projetu foun ho naran “Hasa’e produtividade husi agrikultura sustentavel” iha Raumoko, Munisípiu Lautein, iha loron 29 fulan-setembru tinan 2017.

Projetu ne’e sei hala’o to’o tinan 2022 atu hadi’a produtividade husi agrikultór ki’ik sira no fó-tulun atu fa’an produtu sira ne’e, liuhusi planu dezenvolvimentu nian ida ne’ebé atu ezekuta iha zona Mota Raumoko nian iha Lautein, zona Mota Belulik nian entre Ainaru no Kovalima, zona Mota Loes nian entre Likisá, Ermera no Bobonaru no basia idrográfika Tono nian iha Oekusi Ambenu.

Projetu ne’e hetan finansiamentu husi Programa Seguransa Ai-han no Agrikultura Globál, (GAFSP, sigla iha lian inglés),  ho montante osan dólar amerikanu millaun 21, no sei hala’o liuhusi parseria ho Banku Mundiál, Organizasaun Sosiedade Sivíl sira no Organizasaun Nasoins Unidas nian ba Ai-han no Agrikultura (FAO, sigla iha lian inglés).