Diskursu husi Ministru Estadu Ramos-Horta iha selebrasaun Loron Nasionál Xina nian iha Dili
![MEeCSNnaCelebracaoDiaChina_PG](https://timor-leste.gov.tl/wp-content/uploads/2017/10/MEeCSNnaCelebracaoDiaChina_PG-300x212.jpg)
Ministru Estadu no Konselleiru ba Seguransa Nasionál, José Ramos-Horta, reprezenta Primeiru-Ministru, Marí Alkatiri, iha serimónia selebrasaun Loron Nasionál Xina nian, iha loron 1 fulan-outubru, iha Dili, loron 29 fulan-setembru, iha embaixada Xina nian.
José Ramos-Horta hahú ho konstestualiza formasaun Governu Konstitusionál VII nian ne’ebé hala’o hela, no ho manifesta intensaun Governu nian atu hametin liután relasaun ho parseiru no belun sira Timor-Leste nian. Na’i-ulun ne’e agradese ba Governu Repúblika Populár Xina nian ba “apoiu konstante sira ne’ebé fó ona iha tinan barak nia laran, iha setór oioin, husikedas infraestrutura eskritóriu nian sira ne’ebé presiza tebetebes to’o ba dezenvolvimentu kapitál umanu nian, aleinde subsídiu no asisténsia téknika sira ba dezenvolvimentu rurál”
Ministru Estadu no Konselleiru ba Seguransa Nasionál ne’e hateten katak relasaun ida ne’e, laiha sentidu ida de’it, hodi fó hanoin hikas katak “projetu infraestrutura nian sira ne’ebé tau iha orsamentu ho valór osan dolar amerikanu millaun atus ba atus no ninia osan tomak mai husi Timor-Leste fó ba empreza xineza sira no traballadór xinés kualifikadu no semiespesializadu atus ba atus hamutuk ho traballadór timoroan sira”.
Ministru Estadu José Ramos-Horta asegura katak serbisu kona-ba kriasaun infraestrutura sira ne’ebé maka hala’o to’o oras ne’e iha nasaun laran tomak “sei kontinua lidera husi Dr. Marí Alkatiri, ne’ebé maka halibur hela asesór primeira klase sira ne’ebé maihusi Governu ida uluk no sira seluk atu haree fila-fali projetu hotu-hotu, kontinua ho sira ne’ebé maka forte hela, haloos hirak hirak ne’ebé presiza haloos, lansa projetu foun sira”.
José Ramos-Horta hatete mós katak “Timor-Leste no Xina partilla hamutuk opiniaun kona-ba importánsia atu kontinua no hadi’a dame, estabilidade no ordén globál; halo kooperasaun einvezde konfrontu, relasiona ho kestaun rejionál no globál sira; no importante liután ida mós maka país rua ne’e kontinua ho parseria no kooperasaun bazeia ba fiar-malu, respeitu, iha prátika internasionál sira ne’ebé di’ak, iha prinsípiu, iha regra no iha regulamentasaun sira”.
Loron Nasionál Xina nian komemora tinan da-68 fundasaun Repúblika Populár Xina nian.
Atu haree kona-ba diskursu husi Ministru Estadu no Konselleiru ba Seguransa Nasionál, José Ramos-Horta, klike iha ne’e.