Governu Timor-Leste

Aeroportu internasionál Kay Rala Xanana Gusmão, ne’ebé lokaliza iha Suai, iha Munisípiu Kovalima, inaugura ona iha loron 20 fulan-juñu. Aeroportu rejionál tuan hadi’a filafali ona, tuir pradraun sira ne’ebé define ona husi Organizasaun Internasionál Aviasaun Sivíl nian (OACI-sigla iha lian portugés), ho objetivu atu permite operasaun ne’ebé segura ba aviaun, avioneta no elikópteru sira.

Ho pista ida ho naruk 1,5 km, aeroportu ne’e iha mós eliportu ida (para-fatin ba elikópteru sira), atu fasilita dezlokasaun emerjénsia nian sira, liuliu tula ema-moras sira. Terminál foun ne’e inklui instalasaun sira ba alfándega, postu imigrasaun no kuartél bombeiru sira nian.

Ho aeroportu foun ne’e, hein katak bele kria servisu barak no oportunidade foun sira ba serbisu, ezemplu iha kontrolu tráfegu aéreu, restaurasaun, manutensaun, servisu bombeiru sira nian, meteorolojia, seguransa, transporte pasajeiru sira nian, komunikasaun sira, abastesimentu kombustivel nian.

Infraestrutura ida-ne’e mak iha importánsia boot liu ba dezenvolvimentu ekonómiku rejiaun súl país nian, tantu iha apoiu ba atividade petrolífera sira (ne’ebé benefisia empreza sira ne’ebé serbisu iha plataforma mina-rai no gás nian), no mós ba komunidade sira ne’ebé hela iha kosta súl no serbisu iha setór sira hanesan indústria no agrikultura.

Aeroportu Suai nian tama iha Projetu Tasi Mane nian, iha ne’ebé inklui fábrika Gás Naturál Likefeitu no estrada ne’ebé liga Suai ba Zumalai.

Serimónia inaugurasaun ne’e hetan mós partisipasaun husi Primeiru-Ministru, Rui Maria de Araújo, Ministru Obras Públikas, Transportes no Komunikasoins, Gastão de Sousa, Ministru Planeamentu no Investimentu Estratéjiku, Xanana Gusmão, no personalidade sira seluk tan.