Debate kona-ba asesu ba kréditu ba dezenvolvimentu sustentavel
Iha loron 14 fulan-jullu, hala’o ona Diskusaun Nasionál da-3 entre setór públiku no setór privadu, kona-ba “Asesu ba Kréditu”, iha Timor Plaza, iha Dili.
Iha meza-kabuár ida-ne’e, ko’alia kona-ba problema sira ne’ebé relasiona ho asesu ba kréditu iha banku sira iha Timor-Leste, ho intervensaun husi Alex Tilman, husi Gabinete Primeiru-Ministru, no husi Brígido de Sousa, Prezidente Konsellu Administrasaun Banku Nasionál Komérsiu Timor-Leste (BNCTL, sigla iha lian portugés) nian. Emprezáriu timoroan Jorge Serrano, Grupo Média Nacional nia na’in no Diretór Acelda Unipessoal Lda nian, espezializada iha esportasaun mina-kamii, Higino da Costa, aprezenta dezafiu no oportunidade sira ne’ebé setór privadu sente ona to’o oras ne’e. “Debate kona-ba dezafiu no oportunidade sira ba feto emprezária sira” hala’o husi Clarissia Lay, loja lubun Jacinto nia na’in.
Ministru Estadu, Koordenadór Asuntus Ekonómikus no Ministru Agrikultura no Peskas (MEKAE-MAP), Estanislau Aleixo da Silva, maka prezide eventu ne’e, iha ne’ebé konta mós ho prezensa husi Primeiru-Ministru interinu, Agio Pereira no Vise-Ministru Finansas nian, Hélder Lopes. 
Tuir Ministru Estanislau da Silva, “Governu no setór privadu iha parseria ida ne’ebé di’ak no ida-ne’e importante atu asegura dezenvolvimentu sustentavel”. No nia halo ona apelu ida ba Governu foun, ne’ebé maka sei forma hafoin eleisaun oinmai, atu kontinua serbisu ne’ebé halo ona to’o ohin loron, iha dezenvolvimentu no apoiu ba setór privadu.
Setór privadu, hanesan parseiru dezenvolvimentu setór públiku nian, iha knaar importante atu kontribui ba dezenvolvimentu ekonómiku Timor-Leste nian. Tanba ne’e, presiza duni diálogu regulár ida entre setór rua ne’e, ho objetivu atu hakat liu obstákulu no dezafiu sira ne’ebé iha no kontribui ba diversifikasaun ekonómiku país nian.
Diskusaun Nasionál da-3 entre Setór Públiku no Setór Privadu organiza husi Unidade Setór Privadu husi Gabinete MEKAE nian, ho apoiu husi Kámara Komérsiu no Indústria Timor-Leste (CCI-TL) nian, no konta mós ho prezensa husi membru Governu no Parlamentu Nasionál nian sira, emprezáriu sira no sosiedade sivíl.
