Aprezentasaun kona-ba Estratéjia Nasionál Empregu nian
Hafoin hetan aprovasaun iha sorumutuk Konsellu Ministrus nian, Estratéjia Nasionál Empregu nian ba tinan 2017-2030 aprezenta ofisialmente iha loron 17 fulan-jullu, husi Sekretáriu Estadu ba Polítika Formasaun Profisionál no Empregu (SEPFOPE), ho apoiu husi Gabinete Ministru Estadu Koordenadór Asuntus Ekonómikus (MEKAE) no Organizasaun Internasionál Traballu nian (OIT).
ENE integra pilár prinsipál tolu, bazeia ba merkadu traballu nian: aumenta prokura, hadi’a oferta no haforsa instituisaun sira.
Objetivu prinsipál husi estratéjia ida-ne’e haree liu ba nesesidade atu kria postu serbisu nian foun sira atu hamenus dezempregu no loke oportunidade empregu nian sira ba populasaun joven ne’ebé maka sei tama iha merkadu serbisu iha tinan hirak oinmai.
Ministru Estadu, Koordenadór Asuntus Ekonómikus, Estanislau Aleixo da Silva, afirma filafali katak “empregu hanesan kestaun importante ida no presiza envolvimentu ema hotu nian atu rezolve. Tanba ne’e, MEKAE iha koordenasaun ho SEPFOPE no ho apoiu husi OIT, dezenvolve estratéjia ida-ne’e. Iha sentidu ida-ne’e, ha’u halo apelu ba Governu foun atu aplika estratéjia ne’e”.
Husi ninia parte, Sekretáriu Estadu ba Polítika Formasaun Profisionál no Empregu, Ilídio Ximenes da Costa, hatete katak “Governu kompromete ona atu aplika programa ida-ne’e atubele kria empregu foun sira no hadi’a oportunidade sira empregu nian ne’ebé eziste ona ba timoroan sira”.
