Governu inaugura abrigu istóriku Wasa-Diga nian
Ministru Estadu, Koordenadór Asuntus Ekonómikus (MEKAE) no Ministru Agrikultura no Peskas (MAP), Estanislau Aleixo da Silva, inaugura abrigu istóriku Wasa-Diga, iha aldeia Loi-Huno, Munisípiu Vikeke, iha loron 12 fulan-jullu.
Ne’e hanesan fatin ne’ebé Rezisténsia uza maka’as kontra okupasaun indonézia nian no funsiona lahó forma permanente entre tinan 1989 no 1996, tuir tátika funu gerilla nian “halibur malu no namkari”. Iha fatin ida ne’e maka Taur Matan Ruak, ne’ebé iha tempu ne’ebá kaer knaar Vise-Xefe Estadu Maiór Falintil nian, no Francisco Guterres Lú Olo, Sekretáriu Komisaun Diretiva Fretilin nian, subar an ba. Aleinde sira-ne’e, kuadru intermédiu organizasaun klandestina nian, hanesan Komisáriu Polítiku, Falur Rate Laek, no Komisáriu Polítiku sira hanesan, Lintil, Adjuntu Polítiku, no Trix, Komandante Unidade nian, no sira seluk.
Ba Ministru Estanislau Aleixo da Silva, presiza “prezerva patrimóniu Estadu, proteje fatin sira hanesan ida-ne’e no kria kondisaun atu nune’e turista sira bele vizita fatin sira hanesan Wasa-Diga”.
Ho inaugurasaun ida-ne’e, halo mós mudansa ba abrigu ne’e nia naran, ne’ebé hahú oras ne’e sei hanaran Abrigu ba Dame.
O grupu veteranu sira Kaixa Bua-Malus nian maka sai nu’udar responsavel ba konstrusaun no hadi’a dalan atu asesu ba abrigu ne’e. Grupu ne’e kandidata an ba fundu públiku sira iha tinan 2006, hodi hatama ninia proposta ba Gabinete Primeiru-Ministru nian, ne’ebe enkamiña proposta ne’e ba Gabinete MEKAE nian. Proposta ne’e hetan aseitasaun no grupu ne’e simu apoiu dolar amerikanu millaun 19.538.
Iha serimónia ne’e partisipa mós Xefe Estadu Maiór Forsa Defeza Timor-Leste nian (F-FDTL), Koronél Falur Rate Laek, ofisiál Ligasaun ba Asuntu Veteranu sira nian husi Gabinete Primeiru-Ministru nian, Inês Almeida, no konvidadu sira seluk.
