Ministru Estanislau da Silva fó-sai serbisu ne’ebé dezenvolve ona
Ministru Estadu Koordenadór Asuntus Ekonómikus (MEKAE) no Ministru Agrikultura no Peskas, Estanislau Aleixo da Silva, hasoru-malu ho Prezidente Repúblika, Francisco Guterres Lú Olo, hodi koloka serbisu ne’ebé ninia gabinete dezenvolve ona durante tinan rua ho balun ikus ne’e.
Iha enkontru ida ne’ebé hala’o iha Palásiu Prezidensiál, iha loron 7 fulan-jullu, Ministru ne’e fó hatene, uluk liu maka, koordenasaun entre Gabinete MEKAE nian, servisu no instituisaun sira ne’ebé nia koordena. Ministériu ne’e ministériu boot ida, ne’ebé abranje área no setór sira hanesan Agrikultura, Peska, Turizmu, Indústria Transformadora, Indústria Mineira, Aviasaun Sivíl, Ambiente Negósiu nian, no sira seluk tan. Intervensaun sira iha área sira-ne’e hotu tama iha objetivu globál Governu nian atu hamenus dependénsia ba reseita husi mina-rai no gás.
Ministru ne’e ko’alia kona-ba regulamentasaun no revizaun ba diploma legál balu kona-ba atividade ekonómika, hanesan Lei Sosiedade Komersiál nian no Lei Investimentu Privadu. Iha ona mós esforsu boot ida husi parte Governu nian atu Timor-Leste bele adere ba Organizasaun Mundiál Komérsiu nian (OMK), no mós atu hatama ba Diretór-Jerál OMK nian memorandu kona-ba Rejime Komérsiu Esternu (MFTR, sigla iha lian inglés), ne’ebé fó dalan atu hahú negosiasaun kona-ba adezaun nasaun ne’e nian ba organizasaun multilaterál komérsiu nian ne’e. Timor-Leste iha Estatutu hanesan Membru Observadór OMK nian husi kedas tinan 2016. 
MEKAE-MAP mós fó hatene nós ba Prezidente Repúblika koordenasaun polítika ho Ministériu Negósius Estranjeirus no Kooperasaun kona-ba prosesu adezaun nian ba Asosiasaun Nasaun sira Sudeste Aziátiku nian (ASEAN).
Kona-ba Ministériu Agrikultura no Peskas, na’i-ulun ne’e ko’alia kona-ba diploma sira ne’ebé dezenvolve no mós hirak ne’ebé aprova ona. Nia mós fó-sai atividade sira ne’ebé hala’o iha tinan rua ho balun ikus ne’e, hanesan kuda ai-kameli no teka, reabilitasaun ba plantasaun kafé iha Munisípiu Ermera no Likisá, nune’e mós ho dezenvolvimentu akuakultura, liuhusi apoiu ne’ebé fó ona ba grupu benefisiáriu ki’ik sira, liuhusi subsídiu sira Estadu nian ba atividade hakiak ikan-tilápia.
Ikus liu, na’i-ulun ne’e ko’alia liután kona-ba apoiu ne’ebé fó ona ba reabilitasaun sistema irrigasaun iha fatin sira hanesan Oebaba iha Kovalima, Raibere iha Ainaru, Karau-Ulun iha Manufahi, Larisula iha Baukau no Bulutu iha Laleia.
