Governu Timor-Leste

Sekretaria Estadu ba Apoiu no Promosaun Sósiu-Ekonómika ba Feto (SEAPSEF) aprezenta  Planu Asaun Nasionál kona-ba Violénsia Bazeia ba Jéneru (PANVBJ) tinan 2017-2021, iha loron 16 fulan-juñu, hamutuk ho Primeiru-Ministru, Ministériu sira, organizasaun sira Nasoins Unidas nian iha Timor-Leste, organizasaun Sosiedade Sivíl sira no organizasaun naun governamentál sira (ONG, sigla iha lian inglés).

Governu Timor-Leste afirma fila-fali ninia kompromisu atu hamenus kazu violénsia bazeia ba jéneru. Planu ida-ne’sei sai hanesan matadalan ida atu hadi’a intervensaun Governu nian, iha tinan lima oinmai.

Tuir Sekretária Estadu, Veneranda Lemos Martins, “Governu Timor-Leste, liuhusi SEAPSEF, kompremete atu hadi’a no kuidadu feto sira nia moris, hodi garante sira-nia partisipasaun iha setór hotu no iha moris loro-loron nian. Maski nu’udar nasaun joven ida, Estadu Timor-Leste hatama ona protesaun direitu feto sira nian iha lejizlasaun lubuk ida, liuliu iha Kódigu Penál tinan 2009, ne’ebé makaviolénsia doméstika tama iha kategoria ida krime públiku nian. Kódigu Penál kastigu ema ne’ebé maltrata, no inklui violénsia no abuzu seksuál iha familia, no forma sira seluk husi violénsia bazeia ba jéneru hanesan esplorasaun, prostituisaun no tráfiku umanu. Lei Kontra Violénsia Doméstika (LKVD) promulga ona iha tinan 2010 no Planu Asaun Nasionál kona-ba Violénsia Bazeia ba Jéneru aprova ona husi Konsellu Ministrus iha tinan 2012.”

Veneranda Lemos Martins hatete katak PANVBJ hadi’a mekanizmu koordenasaun nian hodi promove igualdade jéneru iha nivel nasionál no munisipál. Planu ne’e, ne’ebé kompostu husi norma sira no kuadru nasionál no internasionál sira, adota ona lisaun sira ne’ebé hasai iha aplikasaun dahuluk PANVBJ nian, liuliu ninia avaliasaun iha tinan 2012. 

Planu ne’e mosu tanba hetan apoiu tékniku no finanseiru husi UN Women, Fundu Nasoins Unidas ba populasaun (UNFPA) no The Asia Foundation, liuhusi projetu Nabilan, ne’ebé finansia husi Governu Australia, aleinde kolaborasaun no konsulta ba Ministériu sira, Sosiedade Sivíl no organizasaun Feto sira nian.

Bele haree komunikadu imprensa Portavós Governu nian kona-ba lansamentu PANVBJ 2017-2021, iha ne’e.