Timor-Leste komemora Loron Mundiál lahó Tabaku
Governu Timor-Leste nian, liuhusi Ministériu Saúde, halo kooperasaun ho Organizasaun Mundiál Saúde nian iha komemorasaun Loron Mundiál lahó Tabaku, iha loron 31 fulan-maiu tinan 2017, iha Palásiu Sinzas nian, iha Dili.
Iha ninia diskursu, Primeiru-Ministru, Rui Maria de Araújo, fó hanoin katak Timor-Leste hanesan nasaun ida ne’ebé iha valór konsumu tabaku nian ne’ebé aas no konsekuénsia sira husi konsumu ne’e boot liu fali husi VIH-SIDA. Xefe Governu ne’e hateten mós katak, maske dekretu-lei kona-ba kontrolu tabaku nian klaru ona no fó dalan atu halo atuasaun, presiza envolvimentu husi instituisaun Governu nian sira seluk atu fó-sai informasaun ba sidadaun sira no fiskaliza medida sira, atu nune’e ema bele kumpre.
Vise-Ministra Saúde nian, Ana Isabel Soares, reforsa hanoin Primeiru-Ministru nian no promete ona hodi halo sorumutuk ida ho Komisaun Nasionál ba Kontrolu Tabaku nian, atu, hamutuk ho Ministériu Saúde no Polísia Nasionál, observa diretamente aplikasaun husi lei ne’ebé mak vigora ona.
Iha ninia parte, reprezentante husi Organizasaun Mundiál Saúde nian (OMS), Rajesh Pandav, husu ba Governu atu foti medida rigoroza kona-ba kontrolu tabaku nian no harii zona livre husi fuma sigarru, liuliu iha fatin públiku sira.
Tuir Rajesh Pandav, tinan-tinan ema millaun hitu maka mate tanba tabaku, ne’ebé halo ekonomia globál tenke gasta dolar amerikanu triliaun ida ba kuidadu saúde nian sira.
Marka mós prezensa iha komemorasaun ne’e Prezidente Komisaun-F husi Parlamentu Nasionál, Virgílio Hornai, parseiru dezenvolvimentu nian sira, emprezáriu, diretór nasionál husi instituisaun relevante sira, funsionáriu no órgaun komunikasaun sosiál nian sira.
