Polísia Sientífika komemora aniversáriu ba datoluk iha Baukau
Ministru Justisa Interinu no Sekretáriu Estadu Terras no Propriedades, Jaime Xavier Lopes, halo abertura ba komemorasaun aniversáriu ba datoluk Polísia Sientífika Investigasaun Kriminál (PSIK) nian, ne’ebé maka ho tópiku “PSIK hakbesik an ba komunidade liuhusi dalan Justisa”. Serimónia ida ne’e hala’o iha loron 15 fulan-maiu tinan 2017, iha Munisípiu Baukau.
Jaime Xavier Lopes afirma ona katak, tinan ne’e, komemorasaun aniversáriu PSIK nian ne’e hala’o iha Munisípiu Baukau, atu ninia ezersísiu ba nia funsaun sira bele besik liu ba komunidade sira, liuliu iha investigasaun ba kazu omisídiu no falsifikasaun dokumentu sira.
Sekretáriu Estadu esplika katak PSIK iha servisu ne’ebé la hanesan ho polísia sira seluk nian, tanba sira-nia knaar mak trata kona-ba kazu sira ho karáter kriminozu, ne’ebé maka sei subar an husi justisa no ba domíniu públiku. Tanba ne’e, governante ne’e husu ba timoroan hotu atu fó korajen ba PSIK, atu sira bele hala’o sira-nia funsaun ho kualidade, tuir lei, atuhodi rezolve krime sira no entrega ema sala-na’in sira ba justisa.
Diretór PSIK, Vicente Fernandes Brito, informa ona katak aniversáriu ida ne’e hala’o iha Baukau, tuir ho diploma ne’ebé difine atividade PSIK nian ne’ebé fó ámbitu nasionál ida (ka bele hala’o iha teritóriu Timor-Leste laran).
Prezidente Autoridade Munisipál Baukau, António Guterres, husi ba dirijente komunitáriu sira, ba sira balun ne’ebé partisipa iha serimónia ne’e, atu divulga informasaun sira ne’eb’e hato’o iha eventu ne’e, atu nune’e bele fó hatene ba sira seluk ne’ebé la partisipa bele koñese ezisténsia PSIK nian.
