Konsellu Ministrus aprova sistema garantia kréditu
Konsellu Ministrus aprova ona Dekretu-Lei ne’ebé aprova Sistema Garantia Kréditu nian ba Empreza Ki’ik no Média sira (PME-sigla iha lia-portugés) Timor nian sira, bazeia ba proposta hamutuk husi Ministru Estadu Koordenadór Asuntus Ekonómikus no husi Primeiru-Ministru, iha loron 30 fulan-maiu.
Sistema garantia kréditu nian ida, programa públiku atu fó apoiu ba PME Timor nian sira, maka mekanizmu ida ne’ebé Estadu uza fahe risku konsesaun kréditu nian ho banku komersiál sira, hodi fó garantia ida ne’ebé maka kobre montante másimu ida ho valór 70% husi empréstimu sira ne’ebé fó no kumpre rekizitu legál sira ne’ebé mak estabelese ona.
Nune’e Governu buka atu hamenus difikuldade katak PME sira tenke aprezenta garantia sira ba instituisaun bankária sira no fasilita asesu PME sira nian ba finansiamentu iha Banka Komersiál, iha kondisaun merkadu nian sira ne’ebé favoravel. Ida ne’e halo sira kompetitiva liután iha relasaun ho konkorente sira husi rai-li’ur no promove fortalesimentu estrutura emprezariál Timor nian no kriasaun serbisu.
Sistema garantia kréditu nian ne’e sei regula no aplika husi Banku Sentrál Timor-Leste nian, ne’ebé partisipa ativamente iha elaborasaun diploma ne’ebé aprova ona ne’e.
