Governu Timor-Leste

Ministru Estadu, Koordenadór Asuntus Ekonómikus no Ministru Agrikultura no Peskas, Estanislau, dezloka ba Portugál, husi loron 2 to’o 6 fulan-maiu, atu hala’o vizita serbisu nian ida ne’ebé nakonu ho ajenda. Durante loron lima, Na’i-ulun ne’e hala’o sorumutuk ho membru Governu sira no instituisaun parseira sira nasaun ne’ebá nian, kona-ba asuntu Turizmu, Agrikultura, Peskas, Biolojia Mariña no jestaun idrográfika sira no sira seluk.

Ho Sekretáriu Estadu Adjuntu Komérsiu Portugál nian, Paulo Ferreira, ko’alia tema sira hanesan apoiu husi Portugál ba dezenvolvimentu no promosaun Turizmu Rurál, ba formasaun operadór no matadalan turístiku nian sira no iha dinamizasaun arkitetura paizajen nian. Sira na’in rua mós fahe informasaun ba malu kona-ba prosesu adezaun Timor-Leste nian ba Organizasun Mundiál Komérsiu - OMK. Ministru ne’e ko’alia iha sorumutuk ne’ebé hala’o ho Sekretáriu Estadu Negósius Estranjeiru no Kooperasaun, Teresa Ribeiro, kona-ba mós ba tema ne’e.

Ninia omólogu, Ministru Agrikultura, Floresta no Dezenvolvimentu Rurál, Luís Manuel Capoulas dos Santos, konfirma ninia prezensa iha serimónia simu pose Prezidente Repúblika Francisco “Lu-Olo” Guterres nian no iha selebrasaun kona-ba aniversáriu da-15 Restaurasaun Independénsia Timor-Leste nian, hodi reprezenta Estadu portugés. Iha sorumutuk ne’ebé sira hala’o, sira analiza mós kestaun sira kona-ba prosesu produsaun erbáriu no jardin botániku ida iha Timor-Leste, kriasaun laboratóriu ida iha área Veterinária nian no jestaun kona-ba basia idrográfika sira, ne’ebé bele sai hanesan objetu husi protokolu bilaterál ida.

Ministru Estadu ne’e vizita Companhia das Lezírias, atu hatene funsionamentu husi empreza ne’e no atu buka biban sira ba negósiu ne’ebé hanesan iha setór agroflorestál, iha Timor-Leste. Empreza agríkola ne’e, ne’ebé harii iha tinan 1836, hanesan empreza ne’ebé boot liu iha área ida ne’e, ne’ebé eziste iha Portugál, no la iha dependénsia finanseira ba Estadu. Empreza ne’e okupa fatin ho luan besik ektare 18.000, iha ne’ebé hakiak animál no prodús foos, tua, azeite no kortisa. Iha fatin ne’e bele hala’o mós atividade divertimentu, pedagójika nian no seluk tan.

Akompanã husi Ministru Capoulas Santos no husi Prezindente Kámara Munisipál Reguengos de Monsaraz, José Calixto, Ministro Estanilau da Silva dezloka ba vila Monsaraz nian.

Sei iha parte súl Portugál nian, iha sidade Beja, no ho hanoin kona-ba dezenvolvimentu potensialidade sira Timor-Leste nian iha área rekursu bee nian sira, Ministru ne’e vizita Empreza Dezenvolvimentu no Infraestrutra Alqueva (EDIA), nu’udar responsavel ba barrajen ne’ebé maka bele permite kriasaun rezervatóriu artifisiál bee nian husi Europa Osidentál.

Ministru Estanislau da Silva hasoru-malu mós ho Administrasaun Kaixa Jerál Depózitus, banku públiku Portugál nian, atu hahú perseria ida ho Banku Nasionál Komérsiu Timor-Leste nian - BNCTL.