Primeiru-Ministru simu kondekorasaun Kolár Orden Timor-Leste nian
Primeiru-Ministru, Rui Maria de Aráujo, simu kondekorasaun husi grau Kolár Orden Timor-Leste nian husi Prezidente Repúblika, Taur Matan Ruak, iha serimónia atribuisaun kondekorasaun ba servidór distintu sira Estadu nian.
Atribuisaun ne’e hanesan manifestasaun apresu no agradesimentu ida husi Prezidente Repúblika ba titulár sira órgaun soberania Estadu nian ba sira-nia serbisu ho responsabilidade no lealdade iha kontribuisun ba nasaun. “Iha tinan lima ikus ne’e, ita-boot sira serbisu ho lealdade hamutuk ho Prezidente Repúblika, sempre iha respeitu absolutu ba separasaun podér no hatudu responsabilidade iha instituisaun ida-idak”, dehan Prezidente Taur Matan Ruak hodi destaka Primeiru-Ministru hanesan titulár ne’ebé serbisu direta no regulár ho nia.
Husi ninia parte, Rui Maria de Araújo hateten katak kondekorasaun ne’e nia dedika ba kombatente libertasaun nasionál nian sira, liu-liu ba martir libertasaun pátria nian sira ne’ebé kontribui ba konstrusaun Timor-Leste nian nu’udar Estadu no Nasaun, no mós ba membru Governu Konstitusional VI, inklui ba Saudozu Fernando Lasama, ba sira-nia esforsu tomak hodi serbisu nu’udar ekipa ida durante tinan rua ho balun.
Iha okaziaun ne’e, Primeiru-Ministru hato’o ninia apresiasaun ba funsionáriu hotu-hotu ne’ebé maka serbisu iha Gabinete Primeiru-Ministru nian fó apoiu tomak ba nia iha ninia serbisu nu’udar Xefe Governu, no ba Administrasaun Públika tomak ne’ebé serbisu hodi implementa polítika Governu Konstitusionál VI nian.
Xefe Ezekutivu hato’o mós agradesimentu espesiál ba lider Partidu FRETILIN nian sira ne’ebé permite nia no membru Komité Sentrál no mós militante FRETILIN nian balu atu hola parte iha Governu hanesan individu. Aleinde ne’e, na’i-ulun ne’e agradese mós ba Prezidente partidu CNRT nian, Kay Rala Xanana Gusmão, ne’ebé konvida nia atu xefia Governu Konstitusionál VI hanesan ema independente ida.
Aleinde Primeiru-Ministru, na’i ulun sira seluk ne’ebé simu mós kolár Orden Timor-Leste nian maka Prezidente Parlamentu Nasionál, Adérito Hugo da Costa, Antigu Prezidente Parlamentu Nasionál, Vicente da Silva Guterres, Antigu Prezidente Tribunál Rekursu, Guilhermino da Silva, Prokuradór-Jerál Repúblika, José da Costa Ximenes, Vise-Xefe Estadu Maior Falintil-FDTL, Brigadeiru-Jenerál Filomeno Paixão, Xefe Estadu Maior, Coronel Falur Rate Laek no Segundu Komandante PNTL, Komisáriu Faustino da Costa.
