Timor-Leste no Indonézia hala’o sorumutuk nivel aas nian kona-ba ketan-raik
Negosiasaun kona-ba delimitasaun ba segmentu sira husi ketan (fronteira) sira entre Timor-Leste no Indonézia la’o ho di’ak, tuir komunikadu imprensa konjuntu kona-ba sorumutuk daruak entre responsavel nivel aas sira husi nasaun rua ne’e, ne’ebé hala’o iha Dili, husi loron 6 to’o loron 8 fulan-abríl.
Delegasaun Timor-Leste nian xefia husi Vise-Ministru Negósius Estranjeirus no Kooperasaun, Roberto Soares, no delegasaun Indonézia nian husi Embaixadór Desra Percaya, Diretór-Jerál ba Asuntu Ázia-Pasífiku no Áfrika husi Ministériu Negósius Estranjeirus nasaun ne’ebá nian. Segmentu sira husi ketan-raik ne’ebé seidauk define entre nasaun rua ne’e maka Bijaen Sunan/Oben no Noel Besi/Citrana. Parte rua deside ona mós atu halo vizita hamutuk ida ba fatin sira ne’e no iha ona konsensu kona-ba hanoin atu tenke iha konsiderasaun ba lasu sosiokulturál sira no moris-di’ak komunidade sira nian.
Iha loron ida molok loron sorumutuk ne’e nian, hala’o ona reflesaun ida kona-ba “promosaun pás no estabilidade iha Rejiaun liuhusi fahe ita-nia esperiénsia únika sira kona-ba rekonsiliasaun no amizade”, ne’ebé konta ho partisipasaun husi antigu Primeiru-Ministru Timor-Leste nian, Marí Alkatiri, no antigu Ministru Negósius Estranjeirus Indonézia nian, Hasan Wirajuda.
Sorumutuk dahuluk entre responsavel nivel aas husi Timor-Leste no husi Indonézia hala’o ona iha Bali, iha loron 10 no loron 11 fulan-marsu liubá.
Bele haree iha ne’e komunikadu konjuntu kona-ba sorumutuk nivel aas daruak entre Timor-Leste no Indonézia kona-ba definisaun ketan-raik ne’e.
