Governu Timor-Leste

Tempu udan tinan 2016/2017 nian kauza ona estragu iha munisípiu balu no, husikedas inísiu tinan ne’e nian, Governu fó ona apoiu ba vítima sira husi udan-boot ne’ebé hamosu inundasaun no estraga hela-fatin no to’os sira, liu-liu iha Ermera, Metinaru no Dili.

Iha loron 24 fulan-abríl liubá, Vise-Ministru Solidariedade Sosiál, Miguel Marques Gonçalves “Manetelu”, fahe ona materiál konstrusaun nian ba vítima sira husi dezastre naturál hamutuk uma-kain 23, iha Aldeia Hudi Laran, Suku Aisirimou, iha Munisípiu Aileu. Materiál hirak ne’ebé distribui ona maka hanesan kaleen tahan, simentu, besi no arame. Aleinde ne’e, Governu mós apoiu osan oituan, iha ne’ebé uma-kain ida-idak simu dolar amerikanu 300.

Durante entrega, Vise-Ministru ne’e hateten katak família 13 ne’ebé simu apoiu ne’e sai hanesan vítima husi udan-anin iha tinan kotuk no sira seluk vítima husi udan-anin tinan ida ne’e nian.

 “Estadu sei la harii uma foun ba vítima sira, maibé iha responsabilidade atu fó apoiu ba vítima sira atu harii sira-nia uma. No na’i ulun ne’e mós husu ba família sira ne’ebé sai vítima atu buka fatin ne’ebé seguru liu hodi harii sira-nia uma.

Joaõ da Costa, benefisiáriu ida mós, sei halo tuir rekomendasaun sira Vise-Ministru nian no sente haksolok ho apoiu Estadu nian, tanba, maske oituan, tulun ona nia hodi harii uma. 

Iha nivel governamentál partisipa mós iha serimónia ida ne’e maka Sekretáriu Juventude no Desportu, Leovigildo Hornai. Husi Munisípiu Aileu nian, marka prezensa Prezidente Autoridade Munisipál, Komandante PNTL, Diretora Sentru Solidariedade Sosiál, Catarina de Araújo, Xefe Departementu Emerjénsia, Albino Nicolau Freitas, no autoridade lokál sira seluk.