Governu Timor-Leste

Governu Timor-Leste nian, ne’ebé reprezenta husi Ministru Estadu Prezidénsia Konsellu Ministrus, Agio Pereira, partisipa iha selebrasaun sira Loron ANZAC nian, iha loron 25 fulan-abríl, iha jardín Kristu-Rei, iha Dili. Ida ne’e hanesan biban ida hodi hakbesik ba militár sira husi nasionalidade oioin, ne’ebé reforma ona no ne’ebé sei ativu hela, hodi hanoin fila-fali lasu istóriku ne’ebé hahú kleur ona, no iha importánsia boot ba ita-nia futuru komún.

Durante ninia diskursu, Ministru Agio Pereira ko’alia liu kona-ba faktu husi delegasaun ida ne’ebé lidera husi veteranu Prezidente eleitu Francisco Guterres Lu-Olo ne’ebé dezloka ona ba Austrália atu tuir komemorasaun sira ne’e, iha ne’ebé antigu membru FALINTIL balu marxa ona “hamutuk ho soldadu australianu no Zelándia Foun nian sira, iha estrada sira Brisbane nian (iha Estadu Queensland), ne’ebé halo parte iha komemorasaun sira ba Loron ANZAC nian”. Na’i-ulun ne’e mós hatutan katak asisténsia ne’ebé populasaun Timor nian fó ba soldadu australianu sira durante okupasaun Japaun nian iha ita-nia territóriu, “seidauk lakon husi mate-restu sira-nia hanoin, ne’ebé la hatene kole atu hanoin hikas katak, lahó sira-nia tulun karik, ema barak tebes maka sei lakon vida.

Serimónia iha Dili ne’e konta ho prezensa husi membru forsa seguransa sira husi Austrália no Zelándia Foun, membru sira FALINTIL nian, reprezentante veteranu nian sira husi Timor-Leste, Austrália, Zelándia Foun no Turkia no sira-nia família sira.