Kontratu partilla produsaun mina-rai iha rai-maran asina ona
Autoridade Nasionál Petróleu no Minerais (ANPM), TIMOR GAP no Timor Resources (filiál husi kompañia australiana NEPAM) asina ona kontatu partilla produsaun nian hamutuk rua, ba esplorasaun mina-rai no gás iha territóriu Timor-Leste nian, iha loron 7 fulan-abríl. Kontratu sira ne’e ko’alia liu kona-ba peskiza bloku “onshore (iha rai-maran) nian rua iha Timor-Leste, ne’ebé jere husi Ministériu Petróleu no Rekursus Minerais, liuhusi ANPM.
Lokaliza iha zona sudoeste país nian, bloku rua ne’e okupa fatin ho luan besik kilómetru kuadradu 2000, iha ne’ebé identifika ona sinál kona-ba mina-rai no gás ne’ebé mosu iha rai-leten (sinál ne’ebé bele haree ho matan), ne’ebé hatudu katak iha fatin hirak ne’e iha sistema mina-rain nian ida ho potensiál.
TIMOR GAP no Timor Resources halo ona kompromisu atu hala’o estudu sísmiku sira (estudu sira kona-ba rai-nakdoko) iha área ne’e tomak no atu loke posu rua iha bloku ida-idak, iha tinan datoluk. Sei iha investimentu husi dolar millaun 60 to’o dolar millaun 100 iha tinan 7 oin-mai.
Marka prezensa iha serimónia ne’e: Primeiru-Ministru, Rui Maria de Araújo, Ministru Petróleu no Rekursus Minerais, Alfredo Pires, Prezidente TIMOR GAP, Francisco Monteiro, Prezidente Grupu Nepean nian, David Fuller, Prezidente Autoridade Nasionál Petróleu no Minerais, Gualdinho da Silva.
