Delegasaun Parlamentu Europeu nian ko´alia “forma orden no hakmatek” husi prosesu eleitorál
Primeiru-Ministru, Dr. Rui Maria de Araújo, loron 22 fulan-marsu, iha Palásiu Governu, simu Xefe Delegasaun husi Deputadu sira Parlamentu Europa nian ba Misaun Observasaun Eleitorál, Deputada Parlamentu Europa nian, Ana Gomes, ne’ebé akompaña husi deputada Parlamentu Europa nian na’in rua seluk, Marisa Matias no Inese Vaidere. Akompaña delegasaun sira Embaixadór Uniaun Europeia nian iha Timor-Leste, Alexandre Leitão.
Primeiru-Ministru hatudu apresiasaun Governu nian ba resposta husi Uniaun Europeia nian ba pedidu atu halo observasaun eleitorál, no sente satisfeitu tebes ho forma madura ne’ebé instituisaun sira Estadu nian, lider sira no povu Timor-Leste sira nian hatudu bainhira hatán ba prosesu eleitorál nian ne’e tomak. Preokupasaun Governu nian maka garante instutuisaun sira Estadu nian serbisu ho forma kredivel no ho profisionalizmu, no mós iha kestaun sira manutensaun orden públika nian.
Rui Maria de Araújo hateten katak énfaze husi eleisaun parlamentár sira oinmai tenke foka liu iha programa no asaun sira, ne’ebé ninia impaktu sei reflete iha país ne’e no iha povu, no katak, dala ida tan povu maka deside, tanba ne’e hotu-hotu tenke simu rezultadu husi povu nia hili.
Primeiru-Ministru hateten mós katak, iha tinan sanulu ikus ne’e polítika Governu nian sai nu’udar polítika adiantamentu fundu sira, ho investimentu ida ne’ebé maka’as iha infraestrutura sira no iha setór sosiál, ne’ebé hahú fó rezultadu balun, hanesan ezemplu, kona-ba diversifikasaun ekonomia, maske sei presiza dada investimentu privadu barak liután. Primeiru-Ministru aproveita mós hodi agradese ba tulun tomak ne’ebé Uniaun Europeia fó ona liuhusi programa kooperasaun nian sira, liuliu iha área agrikultura nian.
Iha resposta, Xefe Delegasaun Deputadu sira Parlamentu Europa nian, Ana Gomes, tenik dala ida tan disponibilidade tomak husi Parlamentu Europa nian atu apoia Timor-Leste iha aspetu hotu-hotu iha konstrusaun demokrasia nian. 
Kona-ba prosesu eleitorál, Ana Gomes kongratula Primeiru-Ministru, hodi fó atensaun liu ba forma ordem no hakmatek husi prosesu eleitorál. Ana Gomes mós temi kona-ba partisipasaun ne’ebé maka’as husi populasaun ba urna hanesan “matuduk maturidade ne’ebé boot, liuliu tanba nia konsidera katak ida ne’e hanesan ba dala uluk maka Timor-Leste organiza mesak eleisaun sira.” Hatete katak sei halo ba relatóriu ida husi Misaun ne’e, ne’ebé sei inklui mós sujestaun balun husi parte observadór sira nian.
Felisitasaun mai mós husi deputada Parlamentu Europa na’in rua seluk, Marisa Matias no Inese Vaidere, ne’ebé hakarak hatene husi Xefe Governu, sa’ida maka sei sai diferente iha eleisaun parlamentár sira oinmai, no mós oinsá mak investe reseita sira husi mina-rai iha dezenvolvimentu país nian.
