Governu Timor-Leste

Iha loron 15 fulan-marsu, Ministru Estadu,Koordenadór Asuntus Ekonómikus (MECAE) no Ministru Agrikultura no Peskas, Estanislau da Silva, hamutuk ho ekipa Unidade Sertór Privadu nian, dezloka ba Baukau hodi tuir semináriu ida ho tema “Hasa’e koñesimentu grupu benefisiáriu ki’ikoan sira nian no parte interesadu sira liuhusi formasun kona-ba planu negósiu, jestaun negósiu no asesu ba kréditu.

Semináriu ida ne’e, iha nia objetivu atu fahe informasaun sira kona-ba asesu ba kréditu husi banku komersiál timoroan sira nian, hanesan ezemplu, Banku Nasionál Komérsiu Timor-Leste (BNCTL), no mellora koñesimentu kona-ba planu no jestaun negósiu sira. Buka atu atinji objetivu Governu nian, ba dezenvolvimentu ekonomia ki’ik no ba hamenus ki’ak liuhusi setór privadu sira ne’ebé forte, tuir prevee iha Guia Reforma no Fomentu Ekonómiku no Planu Estratéjiku Dezenvolvimentu Nasionál nian.

Eventu ne’e hala’o iha Sentru Dezenvolvimentu Emprezariál  Baukau nian no partisipa husi reprezentante sira husi Institutu Apoiu ba Dezenvolvimentu Emprezariál, husi BNCTL, husi Servisu Rejistu no Verifikasaun Emprezariál -SERVE no Kámara Komérsiu no Indústria Timor-Leste nian.

Tama ona iha ajenda sorumutuk sira seluk ne’ebé hanesan iha munisípiu sira seluk.