Institutu Petróleu asina akordu ho Universidade Melbourne
Iha loron 28 fulan-fevereiru liubá, Institutu Petróleu no Jeolojia (IPJ) no Universidade Melbourne asina ona Memorandu Entendimentu ida iha Melbourne, iha Austrália, ho objetivu atu hadi’a preparasaun rekursu umanu sira iha área Jeosiénsia nian sira, no einjerál iha Siénsia Rai nian.
Ministru Petróleu no Rekursu Minerál, Alfredo Pires, deklara ona katak “ita sente orgullu no agradese tebes ba kolaborasaun entre IPJ no Universidade Melbourne nian ida ne’e”. Hein katak parseria ida ne’e “ bele sai hanesan susesu ida” no “bele iha interkámbiu boot ida iha área Jeosiénsia sira nian”, entre instituisaun rua ne’e.
Prezidente Institutu Petróleu no Jeolojia nian, Hélio Guterres, konsidera katak “kolaborasaun ida ne’e marka era foun ida ba dezenvolvimentu IPJ nian no reprezenta kompromisu ida ne’ebé antes ne’e seidauk akontese, ba prazu naruk, atu hametin kapasidade rekursu umanu sira, liuliu iha área Jeosiénsia no iha Siénsia Rai nian einjerál.” Nia mós ko’alia kona-ba importánsia husi fahe ba malu esperiénsia jeolójika ba jeólogu foin-sa’e timoroan sira, liuhusi formasaun kontinuada iha terrenu, ba serbisu laboratóriu, nune’e mós iha produsaun artigu sientífiku sira.
Lori Universidade Melburne nia naran, Profesór Jim McCluskey hateten katak nia kontente ho akordu ne’ebé halo IPJ ne’e no “hakarak manifesta ami-nia kompromisu no ami-nia agredesimentu sinseru ba IPJ, liuliu ba ninia Prezidente, Hélio Guterres, no ba Ministru Petróleu no Rekursus Minerais Timor-Leste nian, Alfredo Pires, ba ninia konfiansa no nia apoiu di’ak tebes ne’ebé nia fó ona, relasiona ho kolaborasaun iha kampu Siénsia Rai nian. Ami haksolok tebes ho posibilidade atu serbisu hamutuk ho ami-nia parseiru sientífiku timoroan sira, atu ita bele hetan susesu sira ne’ebé boot liután, hanesan ita hotu hakarak”.
Hafoin serimónia asinatura Memorandu ne’e nian, Profesór Jim McCluskey aprezenta mapa jeolólijiku ida kona-ba Lakloo (Manatutu), rezultadu husi kolaborasaun konjunta ida ne’ebé uluk instituisaun rua ne’e halo hamutuk ona.
Marka mós prezensa iha serimónia ne’e, antigu Governadór Estadu Victoria (Austrália) nian, Steve Bracks, no Konsul Onorária Timor-Leste nian iha Estadu Victoria nian, Rae Kingsbury.
