Governu Timor-Leste

Primeiru-Ministru, Rui Maria de Araújo, hala’o vizita ba Postu Saúde Metinaru nian, Postu Administrativu Cristo Rei,  Munisípiu Dili, iha loron 17 fulan-fevereiru tinan 2017.Objetivu husi vizita ne’e atu identifika problema sira ne’ebé maka postu saúde ne’e hasoru hanesan, falta laboratóriu, falta fatin ba konsulta nehan, fatin ba maternidade no seluk tan. Aleinde ne’e, Xefe Ezekutivu mós haree kona-ba utilizasaun sistema dijitál iha prosesu rejistu médiku nian no mós ezekusaun husi programa saúde nian sira atu nune’e bele dezenvolve programa sira ne’e di’ak liután.

Rui Maria de Araújo fó hanoin fali katak, programa Saúde iha Família ne’e la’ós buat foun ida. Uluk iha tiha ona klínika movel no SISKA (Servisu Integradu Saúde Komunitária). Programa ne’e mai intensifika no uniformiza liután servisu hirak ne’ebé sira hala’o tiha ona.

“Liuhusi programa Saúde iha Família ne’e, família hotu-hotu iha priviléjiu atu hetan vizita husi médiku iha sira-nia uma rasik tinan ida dala ida. Maibé dalaruma mós médiku sira la bá vizita sira, nune’e pasiente sira tenke mai iha Sentru Saúde atubele hetan atendimentu husi médiku sira no mós fasilidade saúde nian”, tenik Primeiru-Ministru.

Tuir dadus ne’ebé mak iha, postu saúde ne’e, iha tinan 2015 serve populasaun 5.490 no husi númeru ema hamutuk 5.108, ka 93.04%, maka hetan ona vizita husi médiku sira.

Marka perzensa iha vizita ne’e Prezidente Autoridade Munisipál no mós pesoál saúde sira husi postu saúde Metinaru.