Governu Timor-Leste

Pasajeiru rihun ida atus hitu mai ho ró kruzeiru P&O Cruises, ne’ebé atraka iha Dili iha loron 12 fulan-fevereiru, vizita sidade Dili no mós fatin sira seluk besik Dili hanesan Dare no Maubara.

Diretór Nasionál Marketing, Turizmu no Relasaun Internasionál husi Ministériu Turizmu Arte no Kultura (MTAK), José Quintas, nu’udar koordenadór eventu ne’e nian, informa katak kruzeiru P&O, hafoin sai husi Austrália, liumai Timor-Leste kontinua ba Komodo Indonézia, Bali, Singapura no fila-fali ba Austrália. Ró ne’e, nu’udar ró kruzeiru ne’ebé iha kapasidade boot liu iha mundu.

José Quintas hatutan mós katak bazeia ba informasaun ne’ebé Ministériu Turizmu, Arte no Kultura hetan husi ajénsia ró kruzeiru nian, hafoin hala’o tiha vizita ida ne’e, sei iha tan vizita tolu husi ró kruzeiru, iha tinan ida ne’e, iha fulan-marsu, juñu no setembru.

Daudaun ne’e, Governu, liuhusi Ministériu relevante, hanonin ona atu kria regulamentu hodi bele kontrola ró kruzeiru sira ne’ebé tama mai iha Timor-Leste, nune’e bele minimiza impaktu negativu husi óleu no bee fo’er husi ró sira ne’e, ne’ebé bele estraga ita-nia riku-soin iha tasi laran. Preokupasaun ne’e bazeia ba esperiénsia ne’ebé fatin balun hanesan illa sira iha Karaibas no nasaun sira iha Pasífiku hasoru ona. 

Diretór ne’e esplika liután katak, vizita ne’e la’o ho susesu tanba serbisu hamutuk entre Ministériu no parte relevante sira hanesan Autoriedade Portu Dili, Servisu Imigrasaun nian, PNTL, Kuarentena, Ministériu Komérsiu, Indústria no Ambiente, MTAK, Alfándega no Munisípiu Dili.

Tuir Diretór ne’e, iha futuru presiza transforma portu Dili hodi sai portu espesiál ba ró kruzeiru tanba portu ne’e hanesan portu úniku iha rejiaun Ázia-Pasífiku ne’ebé lokaliza iha sentru sidade nian no besik ba área turístika sira, nune’e fasil ba ajénsia sira atu inklui iha pakote viajen nian.

Tuir observasaun Komisaun Organizadora nian, vizita ró kruzeiru ne’e nian fó duni benefísiu ekonómiku ba populasaun lokál ne’ebé fa’an produtu artezanatu nian sira, nuu-laloir no seluk tan, no transporte lokál sira, maske vizita ne’e iha de’it oras ualu nia laran de’it.

Madalena, vendedór produtu artezanatu nian ida, hateten katak nia sente haksolok tebes tanba durante vizita nia bele hetan dolar amerikanu 500 to’o 1000, ne’ebé tulun tebes ekonomia uma-laran nian. Tanba ne’e nia husu ba órgaun kompotente sira atu kontinua organiza eventu sira hanesan ne’e  tanba aleinde tulun vendedór hetan osan, promove mós produtu lokál.