Governu Timor-Leste

Primeiru-Ministru, Dr. Rui Maria de Araújo, hala’o enkontru datoluk ho dirijente sira Administrasuan Públika nian hodi ko’alia kona-ba dezafiu no oportunidade ne’ebe funsionalizmu públiku iha Timor-Leste  hasoru, liuliu durante tempu eleisaun nian.

Reuniaun ida ne’e hala’o iha sala reuniaun Minsitériu Negósiu Estranjeiru no Kooperasaun (MNEK), iha loron 9 fulan-fevereiru, no hetan partisipasaun hosi Diretór-Jerál no Diretór Nasionál na’in 90 inklui mós Prezidente Komisaun Funsaun Públika (KFP) no komisáriu na’in haat.

Primeiru-Ministru realsa ba Diretór-Jerál no Nasionál sira kona-ba importánsia husi sira-nia suporta atu alkansa ho susesu Programa Governu no objetivu Estadu nian ne’ebe determina ona iha Planu Estratéjiku Dezenvolvimentu Nasionál 2011-2030.

Diretór-Jeral sira maka ponte komunikasaun nian entre polítiku sira no administrasaun públika, haktuir tan Xefe Governu. 

Iha biban ne’ebé hanesan, Koordenadór Auditoria Sosiál Gabinete Primeiru-Ministru nian, Sr. Edio Guterres,  halo aprezentasaun kona-ba funsaun Auditoria Sosiál iha kontestu governasaun aberta.  Jorginha Martins, Téknika Jurídika Gabinete Primeiru-Ministru, mós halo aprezentasaun kona-ba prosedimentu administrativu no direitu atu hetan asessu ba dokumentu públiku.

Partisipante sira husi sorumutuk ne’e mós simu informasaun kona-ba rezultadu husi sondajen kona-ba persesaun públika kona-ba prestasaun servisu Estadu nian sira.

Primeiru-Ministru mós fó hanoin ba Diretór-Jerál no Diretór Nasionál sira kona-ba importánsia husi Funsaun Públika atu kumpre regra sira ne’ebé vigora hela, liuliu, durante tempu eleisaun nian, no asegura katak patrimóniu Estadu nian hanesan telemovel, komputadór no kareta no motór la utiliza fali hodi fó apoiu ba atividade individuu ka partidu politiku sira nian.