Governu Timor-Leste

Ministru Estadu, Koordenadór Asuntu Administrasaun Estadu no Justisa nian no Ministru Administrasaun Estatál, Atuál Ministru Interinu MECAE, Dionísio Babo Soares, fó pose ba Membru sira Konsellu Nasionál Traballu no Arbitrajen Traballu, iha salaun Sekretaria Estadu Polítika Formasaun Profisionál no Empregu (SEPFOPE), iha Kaikoli Dili, iha loron 26 fulan-janeiru tinan 2017.

Ministru Interinu MECAE, Dionísio Babo Soares, hatete katak, iha país demokrátiku ida, mákina Estadu nian no setór privadu sira sai nu’udar parseiru ne’ebé maka funsiona iha asosiasaun kona-ba relasaun traballu. Iha relasaun hirak ne’e, sempre mosu konflitu interese, dezáfiu no problema oin-oin ne’ebé atu rezolve presiza iha regulamentu. Ba ita-nia nasaun, Devér no Responsabilidade ne’e hanesan aspetu rua ne’ebé mak importante tebes atu kria relasaun di’ak, hodi garante traballu no fó prestasaun servisu di’ak ba povu.
Dionísio Babo Soares fó parabéns ba eventu ida ne’e, ne’ebé rezulta husi despaxu Ministru Estadu, Koordenadór Asuntu Ekonómiku no Ministru Agrikultura no Peska nian (n.^u 1405/MECAE/X/2016), ne’ebé nomeia membru sira Konsellu Nasionál Traballu nian, no despaxu Sekretáriu Estadu Polítika Formasaun Profisionál no Empregu, ne’ebé nomeia membru sira Konsellu Arbitrajen Traballu nian.

Intervensaun Konsellu Nasionál Traballu nian justifika husi relasaun traballu loro-loron nian. Konsellu Arbitrajen Traballu nian kria tiha ona prosesu ensinu tékniku, liuliu iha relasaun ho asidente sira traballu nian, seguru sosiál sira, kaixa apozentasaun, no sira seluk.

Ministru esklarese katak Konsellu Arbitrajen iha nia knaar esensiál atu tulun ema sira ne’ebé iha konflitu hodi rezolve sira nia problema ne’ebé iha ligasaun ho atividade traballu, barakliu mak iha karákter sivil. Parte sira ne’ebé iha konflitu ne’e tenke iha korkordánsia ho desizaun sira. Atu vigora, desizaun ida ne’e presiza iha aprovasaun ida husi Tribunál Primeira Instánsia nian, tanba importante tebes fó atensaun ba buat ne’e, hodi haree katak intervensaun husi Konsellu Arbitrajen ne’e maka baratu, simples no lalais.

Iha fatin seluk, Prezidente Konsellu Nasionál Traballu, atuál Sekretáriu Estadu Polítika Formasaun Profisionál no Empregu, Ilídio Ximenes da Costa, hatete katak ho inisiativa ida ne’e, SEPFOPE fotan hakat ida ba oin. Tuir lei, tipu intervesaun ne’e eziste ona iha tinan hirak liubá, atuhodi akompaña ba aplikasaun lei sira traballu nian no saláriu mínimu. SEPFOPE hato’o ninia haksolok ba prezensa husi membru Governu sira, “tanba fó liután forsa no konfiansa ba ita-nia intervensaun hodi aplika lei sira traballu nian”.

Marka prezensa iha serimónia ne’e Vise-Ministru Obras Públikas,Transporte no Komunikasaun, Januário da Costa Pereira, Sekretária Estadu Asuntu Parlamentár, Maria Terezinha Viegas, Sekretáriu Estadu Konsellu Ministrus, Avelino Maria Coelho da Silva no mós diretór no xefe departamentu sira SEPFOPE nian.