Governu Timor-Leste

Ministru Estadu no Prezidénsia Konsellu Ministru, Agio Pereira, lori Timor-Leste nia naran ba tuir diálogu nível aas nian ida kona-ba “Harii Dame Sustentável ida ba Ema Hotu: sinerjia entre Ajenda tinan 2030 ba Dezenvolvimentu Sustentável no Ajenda ba Sustentabilidade Dame nian”, iha sede Organizasaun Nasoins Unidas (ONU) nian, iha Novaiorke. Prezidente Asembleia Jerál , Peter Thomson, maka konvida Ministru Estadu no Prezidénsia Konsellu Ministru, Agio Pereira.

Sekretáriu-Jerál Nasoins Unidas nian, António Guterres, loke diálogu nivel aas ida ne’e iha loron 24 fulan-janeiru. Ministru Estadu Agio Pereira ko’alia kona-ba empeñu Timor-Leste nian ho Objetivu sira Dezenvolvimentu Sustentável (ODS) nian, progresu sira  ne’ebé hala’o ona iha nia implementasaun no espesiál importánsia ba Objetivu 16  (Dame,Justisa no instituisaun sira ne’ebé  efikáz) ba nasaun sira hanesan Timor-Leste no membru seluk  g7+ nian (organizasaun intergovernamentál husi país sira ho esperiénsia konflitu sira ne’ebé foin mosu), durante “Segmentu balu husi nivel aas no debate nian iha sesaun plenária”.

Observa ona mós katak istória Timor-Leste nian “deskobre ona buat balun husi modelu Objetivu sira Dezenvolvimentu Miléniu nian” (molok ODS) no destaka alterasaun sira ne’ebé presiza, “karik intensaun Ajenda foun nian  sei la husik ema ida tau ba kotuk”.

 “Lisaun prinsipál husi ita-nia istória badak nian, hahú kedas iha restaurasaun ita-nia independénsia, iha tinan 2002”, afirma ona katak “bainhira  laiha dame, país ne’e sei la dezenvolve. Lahó  reforsu baze sira dame nian, Estadu sira ne’ebé fraku sei hetan fali perigu no sei hetan rizku hodi hela ba kotuk” tuir dezenvolvimentu globál nian.

Reprezentante sira husi nivel aas Bielorúsia, Kolómbia, Fransa, Serra Leoa, Eslovákia, Sri Lanka no Suisa sira mós kontribui ba iha sesaun plenária ne’e.

Ministru Estadu hala’o sorumutuk ho Prezidente Asembleia Jerál, Peter Thomson, iha loron ida uluk molok atu hala’o eventu ne’e. Sira debate kona-ba progresu sira iha Komisaun Konsiliasaun nian, Objetivu sira husi Dezenvolvimentu Sustentável no Konferénsia ONU nian oinmai kona-ba Oseanu sira. Prezidente agradese ba Governu Timor-Leste tanba nia kontribuisaun ne’ebé ho folin boot tebes ba fundu fidusiáriu. Agio Pereira hetan entrevista husi meiu komunikasaun sosiál, hodi fó liu entrevista ida ba Rádio Nasoins Unidas nian.

Partisipasaun Timor-Leste nian proporsiona importánsia ida no tau ona hanoin iha eventu Nasoins Unidas nian ne’e, kona-ba kestaun ida katak Timor-Leste nu’udar promotór ida ne’ebé la hatene kole, hanesan mós ho Objetivu sira Dezenvolvimentu Sustentável nian.

.......

Lejenda fotografi sira nian

(iha leten)

Panorama Kámara Konsellu Kuradór sira durante diálogu nivel aas Asembleia Jerál nian kona-ba “Harii Pás Sustentável ida ba Ema Hotu: Sinerjia sira entre Ajenda 2030 ba Dezenvolvimentu Sustentável no Ajenda ba Sustentabilidade Dame nian”.

Loron 24 fulan-janeiru tinan 2017

Nasoins Unidas, Novaiorke, foto ONU nian /Manuel Elias

(Iha klaran)

Peter Thomson (liman karuk), Prezidente LXXI Sesaun Asembleias Jerál ONU nian, hala’o sorumutuk ho Agio Pereira, Ministru Estadu no Prezidénsia Konsellu Ministrus Timor-Leste nian.

Loron 23 fulan-janeiru tinan 2017

Nasoins Unidas, Novaiorke, foto ONU nian/Manuel Elias

 (iha kraik)

Peter Thomson (liman kuana), Prezidente LXXI Sesaun Asembleia Jerál ONU, hala’o sorumutuk ho Agio Pereira (klaran), Ministru Estadu no Prezidénsia Konsellu Ministru Timor-Leste nian. Iha mós foto ne’e, Maria Helena Lopes de Jesus Pires, Reprezentante Permanente Timor-Leste nian iha ONU.

Loron 23 fulan-janeiru tinan 2017

Nasoins Unidas, Novaiorke, foto ONU nian/Manuel Elias