Sekretáriu Estadu Komunikasaun Sosiál haruka jornalista na’in 10 ba tuir formasaun iha Indonézia
Atu hasa’e kapasidade iha área Komunikasaun nian, Governu liu hosi Sekretária Estadu Komunikasaun Sosiál (SEKOMS) servisu hamutuk ho Fundu Dezenvolvimentu Kapitál Umanu (FDCH-sigla iha lia-portugés) haruka tan Jornalista na’in 10 ba tuir formasaun durante semana rua iha Lembaga Pers Dr Soetomo (LPDS-sigla iha lia-indonézia), iha Jakarta, Indonézia.
Sekretariu Estadu Komunikasaun Sosiál, Nélio Issac Sarmento, hateten katak, atu hasa’e kapasidade iha área Komunikasaun nian, SEKOMS, tinan-tinan propoin orsamentu liu hosi Fundu Dezenvolvimentu Kapital Uumanu, hodi haruka Jornalista no mós (“media officers”) husi Ministériu oin-oin hodi ba tuir formasaun téknika iha Portugal no Indonesia. Tanba ne’e nia husu mós ba jornalista sira ne’ebé mak ba tuir asaun formasaun ne’e, atu uza oportunidade ida ne’e didi’ak para bele aprende siénsia ho profisionál sira husi estranjeiru, nune’e fila mai bele halo netik buat ruma ba idaidak nia instituisaun no ba Estadu einjerál.
Aleinde formasaun téknika, SEKOMS mós oferese beibeik formasaun iha lian portugés no Inglés ba jornalista sira, tanba ne’e husu ba sira tenki tau atensaun hodi domina lian rua ne’e, tanba lian inglés no portugés importante ba Jornalista sira-nia futuru, tenik Nelio. 
Iha fatin hanesan, Henrique de Carvalho, reprezentante FDCH informa katak, Fundus Dezenvolvimentu Kapital Umana, ne’ebé mak SEKOMS hanesan mós membru iha fundus ne’e, hari iha loron 23 fulan-marsu 2011, iha programa hanesan, promove formasaun, formasaun tékniku no bolsa estudu.Daudaun ne’e formasaun iha rai liur ne’e tama ba kategoria formasaun Profesionál ka Vokasionál.
Henrique mós lori FDCH nia naran, reforsa mós liafuan sira husi SEKOMS, husu ba formandu sira (red-jornalista) wainhira ba tuir formasaun karik tenki tuir regras ne’ebé iha, simu no aprende saida mak hetan iha ne’ebá atu nune’e fila-fali mai bele implementa iha ida-idak nia instituisaun.
Iha tempo hanesan SECOMS entrega mós sertifikadu ba Formandus na’in 10 hosi Relasaun Publika kada Menistériu nian ne’ebé tuir ona formasaun Audio Visual, iha PT. Alam Media-Studio Audivisual PUSKAT Yogyakarta, Indonesia. Serimónia ne’e hala’o iha salaun auditóriu PCM, Palásiu Governu, iha loron 13 fulan Janeiru tinan 2017.
