SECOMS no Camões promove formasaun iha lia-portugés ba Komunikasaun
Atu profesionál sira Komunikasaun Sosiál nian iha Timor-Leste bele fó sai informasaun ne’ebé maka bele hetan fiar (fidedigna) husi públiku, Sekretaria Estadu Komunikasaun Sosiál asina ona protokolu kooperasaun nian ida ho Camões – Institutu Kooperasaun no Lian nian, hosi Portugál, ba ezekusaun projetu Konsultóriu Lian nian ba Jornalista sira, ho durasaun tempu tinan 3, hahú husi tinan 2016 to’o 2019. Serimónia ida ne’e hala’o iha Auditóriu Prezidénsia Konsellu Ministru nian (PKM) iha Palásiu Governu, iha Dili, iha loron 27 fulan-outubru tinan 2016.
Projetu ida ne’e mai husi kontinuasaun husi atividade ida ne’ebé hanesan de’it, formasaun iha lia-portugés ba jornalista timoroan sira, halo parte husi Programa Apoiu nian ba Governasaun Demokrátika (tinan 2012-2015), iha ámbitu Kooperasaun ne’ebé maka Delega husi Uniaun Europeia iha Portugál. Programa ida ne’e permite dezenvolvimentu kona-ba koñesimentu ne’ebé hetan tiha ona no daudaun ne’e envolve mós tékniku Komunikasaun husi Ministériu oin-oin no tradutór sira PKM nian.
Sekretáriu Estadu Komunikasaun Sosiál, Nelio Isaac Sarmento, hateten katak “lia-portugés, nune’e mós tetun, maka lia-ofisiál Repúblika Demokrátika Timor-Leste nian, tuir artigu 13u husi nia Konstituisaun. Tanba ne’e, kooperasaun ho Portugál, ne’e importante tebes atu hamenus falta sira iha setór komunikasaun sosiál ba nivel domíniu lia-portugés nian”.
Nélio Isaac fó sai katak, kualidade informasaun nian ne’ebé fó sai husi meiu sira komunikasaun sosiál, hakerek no dijitál, maka kondisaun importante ida ba dezenvolvimentu sosiál no ekonómiku ba sosiedade timoroan nian. Formasaun ba profisionál sira iha área Komunikasaun nian kontribui maka’as ba objetivu ida ne’e, hodi hasa’e sira-nia kapasidade profisionál sira no koñesimentu iha kbiit matenek nian oinoin. 
Iha ninia diskursu, Embaixadór Portugál nian iha Timor-Leste, Manuel Gonçalves de Jesus, hateten katak, objetivu husi kooperaraun ne’e hodi promove uzu lia-portugés liuhusi órgaun sira komunikasaun sosiál nian, hodi tulun atu habelar notísia sira ho forma ne’ebé di’ak no kontribui ba defeza identidade no kultura país nian.
Partisipa iha serimónia ne’e maka hanesan: Diretór-Jerál Prezidénsia Konsellu Ministrus, Victor Maia, Diretór Nasionál Disemininasaun Informasaun, Orlando da Conceição, Diretora Interina Diresaun Nasionál Tradusaun nian, Ana Paula Marques, Adida husi Kooperasaun Embaixada Portugál nian, Daniela Pereira, Diretór sira órgaun Komunikasaun Sosiál nian no tékniku sira Komunikasaun husi Ministériu no Sekretaria sira Estadu nian.
