Primeiru-Ministru partisipa iha abertura Tour de Timor 2016
Primeiru-Ministru, Dr. Rui Maria de Araújo, partisipa iha abertura Tour de Timor 2016, ne’ebé hahú iha Avenida Marginal, iha Palásiu Governu, ho rota Dili-Manatutu, iha loron 13 fulan-setembru 2016. Primeiru-Ministru mós hola parte ho ninia bisikleta númeru 94 hodi akompaña siklista nasionál no internasionál sira hahú hosi Palásiu Governu ba to’o iha Lahane-Marabia, Dili.
Siklista hosi nasaun sanulu resin-ualu (18) inklui Timor-Leste maka partispa iha halai-taru iha distansia kilómetru atus haat-lima-nulu (450) ne’e, hahu hosi Dili, Remexiu, Lakló, Manatutu, ba to’o Kelikai, Iliomar, Lospalus, no sei ramata iha sidade Baukau iha loron 17 fulan-setembru tinan 2016.
Primeiru-Ministru iha abertura hato’o mensajen boazvindas ba siklista internasionál sira no mós hato’o votu susesu ba siklista sira hotu..
Xefe Governu hateten katak Tour de Timor ne’e di’ak ida no deseja ba siklista sira hotu, liuliu ba siklista internasionál sira atu hatene liután paizajen Timor nian ne’ebé maka furak no mós kultura povu Timor-Leste nian, ne’ebé maka povu sira hein hela iha rota hirak ne’ebé maka siklista sira sei liu.
Iha abertura ne’e Primeiru-Ministru akompaña hosi Prezidente Parlamentu Nasionál, Adérito Hugo da Costa no Sekretáriu Estadu Juventude no Desportu, Leovigildo Hornay.
