Governu Timor-Leste

Prezidente Komisaun ba Reforma Lejizlativa no Setór Justisa nian (CRL-sigla iha lian portugés), Jorge Graça, Reitór Universidade Nasionál Nasionál Timor-Lorosa’e (UNTL), Francisco Miguel Martins, no Dekana Fakuldade Direitu nian Maria Ângela Carrascalão, asina ona, iha loron 24 fulan-novembru, Memorandu Entendimentu ida ba kooperasaun iha ámbitu investigasaun jurídika ne’ebé daudaun ne’e la’o hela, kona-ba kriasaun baze sira ba reforma lejizlativa,

Nune’e, CRL no UNTL/Fakuldade Direitu estabelese parseria ida ne’ebé iha benefísiu ba parte rua hotu, ne’ebé serve ba peskiza, formasaun no divulgasaun kona-ba lei sira, no mós ba aprofundamentu sientífiku no tékniku kona-ba norma sira ne’ebé presiza atu haree fila-fali.

Parseria ida ne’e tama iha metodolojia kooperasaun nian no konsulta inkluziva ida ne’ebé envolve partisipante sira husi setór oin-oin husi sosiedade timoroan nian, liuliu meiu akadémiku. Parseria ne’e ninia objetivu mak atu hetan análize ida ne’ebé kle’an liután kona-ba lejizlasaun, tuir área direitu nian no setór atividade nian sira no aproveita másimu husi ninia potensiál husi Universidade no husi ninia Fakuldade Direitu nian, nu’udar sentru investigasaun sientífika, ensinu superiór no difuzaun koñesimentu kona-ba Direitu nian.